Үкімет мал шаруашылығын қолдауға 30 млрд теңге бөлді

ҚР Үкіметі мал өсірушілерге қолдау көрсету үшін резервтен 30 млрд теңге бөлді. Тиісті қаулыға премьер-министр Әлихан Смайылов қол қойды. Бұл туралы премьер-министрдің баспасөз қызметі хабарлады.

Үкіметте хабарланғандай, аталған қаражатты бөлу мал өсірушілер алдындағы субсидиялар бойынша берешекті жабуға мүмкіндік береді.

Құжатқа сәйкес, Ауыл шаруашылығы министрлігі Абай, Жетісу, Ақмола, Алматы, Шығыс Қазақстан, Жамбыл, Батыс Қазақстан, Маңғыстау, Павлодар және Солтүстік Қазақстан облыстарының бюджеттеріне асыл тұқымды мал шаруашылығын дамытуды, мал шаруашылығы өнімінің өнімділігі мен сапасын арттыруды субсидиялауға берілетін ағымдағы нысаналы трансферттер түрінде 30 млрд теңге аударуы тиіс.

Ең көп сома – 7,8 млрд теңге - Ақмола облысының әкімдігіне бөлінді, 5 млрд теңге Жамбыл облысына, 4,5 млрд теңге – ШҚО-ға, БҚО мал өсірушілері үшін 1 млрд теңге бөлінді.

Жалпы ағымдағы жылы агроөнеркәсіптік кешенді субсидиялауға үкімет барлық көздерден 494 млрд теңге бөлді. Жақын арада инвестициялық субсидиялауға және несиелер мен лизинг бойынша пайыздық мөлшерлемені субсидиялауға қосымша 30 млрд теңге бөлу жоспарлануда. Үкімет АӨК қолдауға резервтен 31 млрд теңге бөлмек.