Қазақстанда отандық өндірістің өздігінен жүретін ауыл шаруашылығы техникасының лизингіне "Жасыл Даму" АҚ қаражатынан 20 млрд теңге бөлінетін болады. Үкіметтің тиісті қаулысына ҚР премьер-министрі Әлихан Смайылов қол қойды.
Премьер-министрдің баспасөз қызметінен хабарлағандай, бөлінген қаражатқа фермерлер лизингке 500-ден астам техника: 80-нен астам комбайн мен 450 трактор сатып ала алады.
Техника 10 жылға дейінгі мерзімге 6% - бен беріледі. Бір лизинг алушыға қаржыландыру сомасы 205 млн теңгеден аспайды. Бір фермер жеңілдікті шарттармен 3 бірліктен аспайтын өздігінен жүретін ауыл шаруашылығы техникасын сатып ала алады. Қаржыландыруды екі жыл ішінде бір рет қана алуға болады.
Мемлекет басшысының тапсырмасы бойынша 2022 жылғы тамызда еліміздің машина-трактор паркін жаңарту мақсатында ауыл шаруашылығы техникасын жеңілдікпен лизингке алудың жаңа бағдарламасы іске қосылды.
Өткен жылы 900-ге жуық шаруа жылдық 6% - бен бастапқы жарнасыз қысқа мерзімде лизингке 1053 техника сатып алды: 176 комбайн және 877 трактор. Бұл ретте жаңа техника 2022 жылғы егін жинау науқанына уақтылы қатысты.
Баспасөз қызметі техникалық регламенттерде белгіленген экологиялық талаптарға сәйкес келетін және барлық қажетті сәйкестік сертификаттары бар техника лизингке берілетінін атап өтті.
Ауыл шаруашылығы министрлігінің деректері бойынша, жалпы ҚР-да ауыл шаруашылығы техникасының жеңілдікті лизингінің жыл сайынғы көлемі 170 млрд теңгеден асады
