Үкімет астық экспортын субсидиялауға 30 млрд теңге бөледі

ҚР Ауыл шаруашылығы министрлігі "Азық-түлік астығын тасымалдауға байланысты шығындардың құнын арзандатуға субсидиялар төлеу қағидаларын бекіту туралы" Үкімет қаулысының жобасын жариялады.

Аталған ережелер шеңберінде көлік экспедициясы шартының негізінде бірыңғай оператор астық жеткізуді ұйымдастырады деп жоспарлануда. Субсидиялар астық тасымалдау бойынша нақты көрсетілген қызметтер үшін бюджеттен операторға жіберілетін болады. Субсидиялардың түпкілікті алушылары астық жеткізушілер болып табылады.

Бюджеттік субсидияларды төлеу жеткізушілердің бидайды тасымалдау кезінде шығындарды жүзеге асырғанын растайтын құжаттар негізінде жүзеге асырылады:

• Ресей Федерациясының аумағы арқылы Ресейдің Қара және Балтық теңіздерінің порттары бағытында транзитпен;
• РФ, Латвия, Литва, Эстония аумағы арқылы Балтық теңізі порттары бағытында транзитпен;
• Оңтүстік-Шығыс Азия елдері бағытында Қытай арқылы транзитпен;
• Түркіменстан арқылы Ауғанстан бағытында транзитпен;
• Әзірбайжан, Грузия, Армения және Иран бағытында.

Субсидиялардың мөлшері бір тонна үшін 20 мың теңгені құрайды.

Барлығы 1,5 млн тонна астықты экспорттық тасымалдауға арналған шығындарды субсидиялау жоспарлануда. Бұл мақсаттарға республикалық бюджеттен 30 млрд теңге бөлінеді.