Премьер-министр Олжас Бектенов Ақмола облысындағы көктемгі егіс жұмыстарының барысын тексеріп, аграрлармен кездесіп, Макинскідегі құс фабрикасына барды. Бұл туралы үкіметтің баспасөз қызметінен хабарлады.
Өңірде егіс науқаны басталды: қазіргі уақытта 510 мың га егілді.
Өңірдің ірі ауыл шаруашылығы құрылымдарының басшыларымен кездесу барысында үкімет басшысы саланы дамытудың өзекті мәселелерін талқылады. Өндірушілер отандық тыңайтқыштар өндірісін ұлғайту, дизель отынын есептеу нормативін ұлғайту, сондай-ақ инвестициялық субсидиялар бағдарламалары бойынша өз тілектерін білдірді.
Олжас Бектенов әкімдікке және бейінді министрліктерге айтылған барлық мәселелерді ерекше бақылауда ұстауды, оның ішінде ЖЖМ уақтылы жөнелтуді және шаруашылықтарды субсидиялар мен жеңілдікті несиелер түрінде мемлекеттік қолдау шараларымен барынша қамтуды тапсырды. Биыл облысқа барлығы 83 мың тонна жеңілдікті дизель отыны бөлінді, бұл егіс науқаны кезінде фермерлердің қажеттіліктерін толық қамтамасыз етеді. Ағымдағы жылы облыс аграрлары топыраққа шамамен 258 мың тонна минералды тыңайтқыш енгізуді жоспарлап отыр, бұл өткен жылмен салыстырғанда 57% - ға артық. Премьер-министр атап өткендей, отандық тыңайтқыштарды сатудың басым бағыты ішкі нарық болып табылады.
"Мемлекет басшысының тапсырмасы бойынша биыл біз агроөнеркәсіптік кешенді қаржыландыру көлемін ұлғайттық. Қазір біздің ортақ міндетіміз-көктемгі егісті уақытылы және сапалы өткізу. Азық-түлік қауіпсіздігі мен экспорттық әлеует осыған байланысты. Үкімет тарапынан барлық қолдау шаралары көрсетілуде. Проблемалық мәселелер бойынша әкімдік пен бейінді министрлікті жедел хабардар ету қажет", - деп атап өтті Олжас Бектенов.
