Қазақстанда ауыл шаруашылығы мақсатындағы жерлерді бөлу кезінде әлеуетті иелердің топырақ сапасын, өсімдік жамылғысын сақтауға, жайылымдардың тозуын болдырмауға, ауыспалы егісті сақтауға және жерді ұтымды пайдалану тиімділігін арттыру үшін басқа да қарсы міндеттемелерге қойылатын жауапкершілігі бөлігінде конкурстық талаптар күшейтіледі. Бұл туралы ҚР премьер-министрінің баспасөз қызметі хабарлады.
Үкіметте пайдаланылмаған және заңнаманы бұза отырып берілген жерлерді алып қою жөніндегі комиссияның кезекті отырысы өтті.
Жер ресурстарын басқару комитетінің төрағасы Мұрат Теміржановтың мәліметінше, 2024 жылдың басынан бастап мемлекетке 391,2 мың га ауыл шаруашылығы жерлері, ал 2022 жылдан бастап барлығы 10,4 млн га қайтарылған. Оның ішінде жергілікті халыққа 3,7 млн га (мал жаю үшін жалпы пайдалануға – 1,72 млн га, конкурстық негізде бөлек пайдалануға – 1,69 млн га) қайта бөлінді.
"Айта кету керек, 4,4 млн га ауыл шаруашылығы жерлері немесе 2022 жылдан бастап ел бойынша қайтарылған барлық жерлердің 44%-ы бұрын 204 ірі кәсіпкерлік субъектілерінің қолында болған", - деп хабарлады Мұрат Теміржанов.
Баспасөз қызметінің мәліметінше, жайылым тапшылығын азайту үшін әкімдіктерге жалпы пайдалануға 562,1 мың га жайылымдық жер бекітіліп, 65,1 мың га жайылым конкурстық негізде жер пайдалануға берілді, 746,6 мың га резервке алынды. Елді мекендер шегіне 97,3 мың га жайылымдық жер енгізілді.
"Бүгінгі таңда біздің басты міндетіміз - жерді алып қою ғана емес, тиімді пайдалану және жер пайдаланушыларды бақылау. Алынған жерлерді пайдалану мен жақсарту үшін жауапкершілікті күшейту қажет. Конкурс шарттарын бизнес-қоғамдастықпен, әкімдіктермен және басқа да мүдделі қатысушылармен талқылау. Топырақты, өсімдік құрамын сақтау, заманауи технологияларды қолдану бойынша қарсы міндеттемелер қою керек. Ол үшін жерді бөлудің жаңа ережелері мен қағидаттарын әзірлеңіздер", — деп атап өтті вице-премьер Серік Жұманғарин.
Пилоттық режимде МЖК 2.0 ААЖ-да жер пайдаланушының кабинеті құрылған. Онда топырақтың (гумустың, жылжымалы минералдардың) және өсімдік жамылғысының жағдайын сапалы агрохимиялық сипаттайтын жер учаскесі туралы ақпарат болады. Учаскені зерттеу оны ұтымды пайдалану өлшемшарттарын сақтау үшін 5 жылда бір рет жүргізілетін болады. Егер көрсеткіштердің нашарлауы анықталса, тиісті шаралар қабылданатын болады.
