Азық-түлік корпорациясы ресми түрде бидай сатып алу бағасын жариялады

"Азық-түлік корпорациясы" ұлттық компаниясы форвардтық сатып алу бағдарламасы аясында 2023 жылғы ауыл шаруашылығы өнімін қабылдауды бастады. Сондай-ақ, корпорация 9 қазанда экономиканы жаңғырту жөніндегі мемлекеттік комиссия бекіткен сатып алу бағаларын ресми түрде жариялады.

Азық-түлік корпорациясы өнімнің тоннасына сатып алу бағасын белгіледі:

• 3-класты қатты бидай - ҚҚС-пен 130 мың теңге;
• 3-класты бидай Hi-pro (желімшесі 27%-дан бастап) - ҚҚС-пен 130 мың теңге;
• 3-класты бидай (23%-дан бастап желімшесі) - ҚҚС-пен 120 мың теңге;
• 4-сыныпты бидай - ҚҚС-пен 105 мың теңге;
• 2-класты арпа - ҚҚС-пен 65 мың теңге.
  

Ауыл шаруашылығы өнімдерін қабылдау Азық-түлік корпорациясы айқындаған лицензияланған астық қабылдау кәсіпорындарына алдын ала төлем сомасына жүзеге асырылады.

2023 жылы күрделі табиғи-климаттық жағдайларды ескере отырып, алдын ала төлем сомасын айыппұл төлемей ақшалай қаражатпен қайтаруға жол беріледі.

Форвардтық сатып алу шарттарының орындалуы бойынша қосымша ақпаратты Азық-түлік корпорациясының облыстық өкілдіктерінен алуға болады.

Күнбағыс, зығыр тұқымы, қарақұмық және күнжараны сатып алу бағасы кейінірек жарияланады.