Жамбыл облысының әкімдігі мен Indorama Corporation Pte компаниясы Қазақстан-Сингапур бизнес-форумы аясында өңірде тыңайтқыштар өндірісін іске қосуды көздейтін өзара ынтымақтастық туралы Меморандумға қол қойды. Бұл туралы облыс әкімінің баспасөз қызметі хабарлады.
"Компания облыс аумағында құрамында фосфор бар тыңайтқыштар шығаратын зауыт салу жобасын іске асыруды жоспарлап отыр. Жобаның құны - 250 млндоллар. Жобалық қуаты -150 мың тонна түйіршікті суперфосфат. Жоба аясында 800 жұмыс орны ашылады", - деп хабарлады әкімдік.
Іndoram компаниясының әлемнің 37 елінде 150-ден астам өндіріс орны бар, оның ішінде сегіз елде 10 тыңайтқыш зауыты бар.
Форумға ҚР премьер-министрі Әлихан Смайылов, Сингапур президенті Халима Якоб және 200-ге жуық делегат қатысты.
Премьер-министрдің баспасөз қызметі хабарлағандай, форум қорытындысы бойынша 275 млн доллар сомасына құжаттарға қол қойылды.
