Қостанай облысында құны 7,2 млрд теңге болатын ірімшік өндірісі іске қосылады

Қостанай облысында ірімшік өндіретін зауыт құрылысы жүріп жатыр. Жобаға шамамен 7,2 млрд теңге инвестицияланады. Бұл туралы облыс әкімі Құмар Ақсақалов мәлімдеді.

"Жобаны қазірдің өзінде 100-ден астам жоғары сапалы табиғи сүт өнімдерін шығаратын "Милх" компаниясы жүзеге асыруда. Зауыттың өңдеу қуаты жылына 2 мың тоннаны құрайды", - деп жазды өңір басшысы әлеуметтік желілерде.

Өндірісті пайдалануға беру 2024 жылғы қарашаға жоспарланған. Бұл жобаны іске асыру облыста өңделген сүттің үлесін 46%-дан 60%-ға дейін арттыруға мүмкіндік береді.

Кәсіпорында 35 жұмыс орнын құру жоспарлануда.

Жалпы, әкім облыста ауыл шаруашылығы өнімдерін қайта өңдеу саласында бірқатар инвестициялық жобалар іске асырылып жатқанын атап өтті. Мемлекет басшысының тапсырмасына сәйкес, үш жыл ішінде агроөнеркәсіптік кешендегі өңделген өнімнің үлесін 70% - ға дейін арттыру міндеті тұр.