Ақмола облысында мұздатылған дайын тағамдар өндірісі іске қосылады

Ақмола облысында 2024 жылы IL-TOV құс етін терең өңдеу зауыты пайдалануға берілді. 2025 жылдың ортасына қарай ЖШС жобаның екінші кезеңін - кең ассортиментте және жоғары сапада дайын мұздатылған толық жиынтықты бірінші және екінші тағамдарды шығару жөніндегі комбинат құрылысын іске асыруға кірісуді жоспарлап отыр. Бұл туралы Ауыл шаруашылығы министрлігінің баспасөз қызметі хабарлады.

"Зауыт іске қосылғаннан кейін ірі жұмыс берушілердің компанияларын жоғары сапалы толыққанды мәзірмен қамтамасыз ету және олардың бейінді емес қызмет түріне арналған шығындарын кепілдікпен төмендету мүмкіндігі пайда болады. Инвестиция сомасы шамамен 6,5-7 млрд теңгені құрайды", - деп атап өтті Ауыл шаруашылығы министрлігі.

Қазіргі уақытта өндірісте өнімділігі жылына 3300 тонна дайын өнім болатын етті жартылай фабрикаттарының желісі жұмыс істейді: екі түрдегі шницельдер, стрипстер, нагетстер, митболдар, котлеттер.

"Автоматтандыру және өнімділік деңгейі бар зауыт Қазақстан аумағында бірінші болып табылады. 2024-2025 жылдары біз тағы бір желі қойып, жылына 10-12 мың тонна қуатқа шығуға ниеттіміз. Қазіргі уақытта инвестиция көлемі 3,7 млрд теңгені құрады. Екінші желіні орнату үшін шамамен 3 млрд теңге көлемінде қосымша инвестициялар тартылатын болады",-деді "IL-TOV" ЖШС басшысы Михаил Шейкман.

Қазіргі уақытта компания Қазақстан аумағында өнімді сатуға кірісті және кәсіпорынды жеткізушілер тізіліміне енгізу және бюджеттік ұйымдармен ынтымақтастық жөнінде шаралар қабылдауда.

Бүгінгі күні зауытта 85 адам жұмысқа орналастырылды, екінші желіні орнатқаннан кейін жұмыс орындарының саны 200-ге дейін артады.