Жоғары өнімділік болжамын ескере отырып, Азық-түлік корпорациясы астықты солтүстік облыстардың ең көп жұмыс істейтін элеваторларынан астық етпейтін батыс және оңтүстік аймақтарға көшіруді жүзеге асырады. Сондай-ақ, Орталық Азия мен Қытай елдері бағытында астықты экспортқа өткізу бойынша жұмыстар жанданды. Бұл туралы Азық-түлік корпорациясының баспасөз қызметі хабарлады.
"Өткен екі аптада Азық-түлік корпорациясы ұн тарту кәсіпорындарын, құс және мал шаруашылығы шаруашылықтарын қоса алғанда, ішкі және сыртқы нарықтарда 100 мың тоннадан астам астықты көшіріп, сатқан болатын. Бұл көлемдер ішкі және экспорттық қажеттіліктерді ескере отырып бөлінген. Сонымен қатар, астық қабылдау пункттерінің қосымша көлемді қабылдауға дайындығына қарай Азық-түлік корпорациясы жөнелтуді 300 мың тоннаға дейін ұлғайтуды жоспарлап отыр", - деп хабарлады компанияда.
Сонымен бірге Азық-түлік корпорациясы мен жергілікті атқарушы органдардың қызметкерлері встықты сақтауға қабылдау мақсатында Қазақстанның астық егетін өңірлерінде тоқтап тұрған элеваторларға егжей-тегжейлі бағалау жүргізді. Нәтижелері бойынша 2024 жылғы егінді қабылдауға ықтимал жарамды элеваторлар бөлінді және олар бойынша қажетті құжаттарды ресімдеу тұрғысынан иелерімен жұмыс жүргізілуде.
Сонымен қатар, астықты сақтау жөніндегі Азық-түлік корпорациясының талаптарына толық сәйкес келмейтін және жұмыс істеуін жалғастыру үшін инвестициялар қажет астық қоймаларына инвесторларды іздестіруге жәрдем көрсетілетін болады.
"Осылайша, қосымша элеваторлық қуаттарды қосу экспорттық жөнелтуді жандандырумен және астық қозғалысының мониторингімен бірге 2024 жылғы егінді қолда бар астық қоймаларына қосымша 2 млн тоннаға дейінгі көлемде сақтауға орналастыруға мүмкіндік береді", - деп хабарлады Азық-түлік корпорациясында.
