Қызылорда облысының ауыл халқының табысын арттыру жобасы аясында 3 млрд теңге бөлінеді. 600-ге жуық ауыл тұрғындары мен ауыл шаруашылығы кооперативтері өз ісін құруға немесе дамытуға жеңілдікті шағын несие ала алады. Бұл туралы ҚР Ауыл шаруашылығы министрлігінің баспасөз қызметі хабарлады.
Ауыл шаруашылығы министрлігінің басшысы Ербол Қарашөкеев Қызылорда фермерлерімен кездесуде облыста ӘКК арқылы инвестициялық жобаларды қаржыландыру бойынша СҚО тәжірибесі таралатынын хабарлады.
Сондай-ақ, Ербол Қарашөкеев егістікке дайындық туралы айтты. Өңірлерге көктемгі дала жұмыстарын жүргізуге 413 мың тонна дизель отыны бөлінді, оның ішінде Қызылорда облысына -12,1 мың тонна белгіленген жеңілдікті баға бойынша. Шымкент МӨЗ-де жөндеу жұмыстары аяқталып, 12 сәуірден бастап оңтүстік өңірлерге дизель отынын жөнелту басталды. Қызылорда облысына 200 тонна ЖЖМ жөнелтілді.
Кездесуде сондай-ақ жер ресурстарын пайдаланудың проблемалық мәселелері, ең алдымен пайшылардың жағдайы көтерілді. Министрдің айтуынша, қазір арнайы Комиссия жұмыс істейді, оның құрамына мүдделі мемлекеттік органдардың өкілдері кірді. Пайшылардың құқықтарын қорғауды күшейту үшін Комиссия шеңберінде Мәжілісте қаралатын заңнамаға бірқатар түзетулер әзірленді.
"Осы түзетулермен жергілікті атқарушы органдарға пай жерлерінің есебін жүргізу бойынша құзырет беру, сондай-ақ жалпы жиналысты өткізу мерзімдерін белгілеу, жерді кепілге беру кезінде ортақ үлестік меншіктің барлық қатысушыларының нотариаттық келісімін міндетті түрде алу, пайшылардың құқықтарының сақталуын бақылау жөніндегі жер ресурстарын басқару комитетінің құзыретін кеңейту және ауыл шаруашылығы құрылымдарының басшыларына қатысты әкімшілік жауапкершілік көзделген ",- деді Ербол Қарашөкеев.
Бұдан басқа, мемлекет басшысының тапсырмасы бойынша министрлік пайдаланылмайтын ауыл шаруашылығы жерлерін алып қою жөніндегі жұмысты жалғастыратын болады. Биыл еліміз бойынша қосымша 5 млн га ауыл шаруашылығы жерін қайтару жоспарлануда. Өткен жылы Қызылорда облысы бойынша мемлекетке 157,3 мың гектар пайдаланылмаған және заңсыз берілген учаскелер қайтарылды, ағымдағы жылға тағы 200 мың гектар жерді қайтару жоспарланған. Бұл алаңдар, ең алдымен, мал жаю жөніндегі қажеттіліктерді қанағаттандыру үшін ауыл тұрғындары арасында бөлінетін болады.
Қазіргі уақытта облыс әкімдіктері елді мекендердің шекараларын оларға іргелес босалқы жерлерді қосу, жайылымдарды жергілікті халыққа босалқы жерлерден қайта бөлу, сондай-ақ ауыл шаруашылығы алқаптарын жайылымдарға айналдыру жолымен кеңейту бойынша жұмыс жүргізуде.
