ӘКК фермерлерден 182 мың тонна көкөніс сатып алды

Әлеуметтік-кәсіпкерлік корпорациялар (ӘКК) бүгінгі күні 181,8 мың тонна көлемінде күзгі өнім қорын қалыптастырды. Өнімдер 2024 жылғы маусымаралық кезеңде ішкі нарыққа реттеуші әсер ету үшін пайдаланылатын болады. Бұл туралы Ауыл шаруашылығы министрлігінің баспасөз қызметі хабарлады.

Тұрақтандыру қорына 102,6 мың тонна картоп, 28,3 мың тонна пияз, 22,3 мың тонна қырыққабат, 28,6 мың тонна сәбіз сатып алынды.

АШМ-де ӘКК жұмысы ағымдағы жылдың басынан бастап қайта форматталғанын еске салды. Күзгі және ерте көкөністерді (картоп, пияз, сәбіз, қырыққабат) маусымаралық және бағаның өсуі кезеңінде белгіленген бағамен жеткізу үшін шарттың жалпы сомасының 70% аванс бере отырып, ауыл шаруашылығы өндірушілерін форвардтық қаржыландыру бойынша (бір жыл бұрын) жаңа тәсілдер енгізілді.

Бұдан басқа, өнімді сату басталғанға дейін ауыл шаруашылығы өндірушілерінде өнімді сақтау шарттары айқындалды, өткізу нүктелері мен сауда объектілерін көрсете отырып, көкөністерді жеткізу кестесін қалыптастыру көзделген. Сондай-ақ, өңдеу кәсіпорындарын форвардтық қаржыландыру шеңберінде әлеуметтік маңызы бар азық-түлік тауарларының (қарақұмық жармасы, күріш, күнбағыс майы, ұн және қант) тізімі кеңейтілді.

Сауда желілеріне бөлінетін қаражаттың негізгі көлемін құю тәжірибесінен бас тарту үшін міндетті шарт бюджет қаражатының 70% ауыл шаруашылығы өндірушілері мен қайта өңдеу кәсіпорындарын қаржыландыруға бағыттау болды.