Шымкент пен Түркістан облысының жылыжайларына 900 млн теңге субсидия төленді

Шымкент пен Түркістан облысының жылыжай шаруашылықтарына субсидиялар төлене бастады. Бүгінгі таңда төлемдердің жалпы көлемі 900 млн теңгеден асты. Бұл туралы ҚР Ауыл шаруашылығы министрлігінің баспасөз қызметі хабарлады.

Жылыжайларды мемлекеттік қолдау өсімдік шаруашылығын субсидиялау Ережелеріне фермерлік жылыжайларға маусымаралық кезеңде жабық жерде көкөніс өсіру кезінде электр энергиясына, газға және көмірге шығындарды субсидиялауға мүмкіндік беретін норма енгізілгеннен кейін мүмкін болды. Түзетулер 2023 жылы елдегі жылыжай көкөністерін өндірудің рентабельділігін қолдау мақсатында енгізілді.

Субсидиялауды енгізу үшін техникалық реттеу және метрология комитеті қысқа мерзімде 2023 жылдың 1 мамырынан бастап күшіне енген "Фермерлік жылыжайлар. Жалпы техникалық шарттар" ұлттық стандартын әзірледі. 25 желтоқсандағы жағдай бойынша ұлттық стандартқа сәйкестік сертификаттарын 814 жылыжай алды, тағы 825 өтінім қаралуда.

Түркістан облысы мен Шымкентте фермерлік жылыжай иелеріне субсидиялар төлеу басталды.

"Желтоқсан айында көкөніс дақылдарын жабық жерге отырғызу басталады, ал субсидия нормалары, Ережеге сәйкес, алынған көшеттердің қорытындысы бойынша бір дақыл айналымына белгіленеді (1 шаршы метрге тамыр жайған көшеттердің кемінде 95%). Түркістан облысында фермерлік жылыжайларға төленетін төлемдердің жалпы көлемі 565 млн теңгені, Шымкентте – 341,9 млн теңгені құрады. Бұл ретте Түркістан облысында 112 субсидия алушының 106-сы фермерлік жылыжайлар, 6-ы өнеркәсіптік жылыжайлар", - деп хабарлады АШМ.

Бұдан басқа, инвестициялық субсидиялар шеңберінде АШМ жылыжай шаруашылықтарын қолдау үшін инвестициялық субсидиялар шеңберінде жылыжай кешендерін салу және кеңейту жөніндегі жобаларды іске асыру кезінде үлесті 25% - дан 30% - ға дейін ұлғайту бөлігінде өзгерістер енгізілді. Өзгерістер 2023 жылдың 10 желтоқсанынан бастап күшіне енді.