ҚР президенті Қасым-Жомарт Тоқаев "Қазақстан Республикасының кейбір заңнамалық актілеріне жайылымдарды пайдалану мәселелері бойынша өзгерістер мен толықтырулар енгізу туралы" ҚР Заңына қол қойды. Бұл туралы Ақорданың баспасөз қызметі хабарлады.
Заңмен бес заңнамалық актіге, оның ішінде Жер және Орман кодекстеріне түзетулер енгізіледі.
"Түзетулердің бірінші блогы жеке ауланың ауыл шаруашылығы жануарларын жаюға арналған жайылымдық алқаптардың тапшылығын жоюға бағытталған. Осы мақсатта жайылымдардың жаңа кіші түрі – "қоғамдық жайылымдар" енгізілді, олар тек жергілікті тұрғындар жеке ауланың ауыл шаруашылығы жануарларын жаю үшін пайдаланылатын болады. Олар жалға берілмейді", - деп түсіндірді баспасөз қызметінде.
Бұл ретте қоғамдық жайылымдарға жатпайтын жайылымдар жалға берілуі және шөп шабу үшін пайдаланылуы мүмкін.
Сондай-ақ жайылымдарды ауыл шаруашылығы алқаптарының басқа түрлеріне ауыстыруға тыйым салынуда. Шалғайдағы мал шаруашылығы мен мал жаюға арналған жерлер уақытша өтеусіз жер пайдалану құқығымен (5 жылға) тек конкурстық тәртіппен берілетін болады.
Ормандардың ресурстық әлеуетін ұтымды пайдалану үшін орман/табиғат қорғау мекемелері жыл сайын әкімдіктерге бос емес және бос алаңдарды, олардың орналасқан жерлерін көрсете отырып, шөп шабу және мал жаю мүмкін болатын орман қорының учаскелері туралы хабардар ететін болады.
Түзетулердің екінші блогы жайылымдарды басқару және оларды пайдалану жөніндегі жоспарларды жасау және бекіту жөніндегі талаптарды жаңартты.
Үшінші блок жайылымдардың деградациясы мен шөлейттенуіне, сондай-ақ олардың сулануына қарсы күрес тетіктерін күшейтті.
"Жайылымдардың жай-күйін қалпына келтіру және жақсарту үшін жайылымдарға геоботаникалық зерттеу, мониторинг және түгендеу жүргізу, сондай-ақ басқа да шаралар көзделген. Жер пайдаланушылар мен меншік иелерінің топырақ құнарлылығының жойылуына жол бермеу, ауыл шаруашылығы жерлерін жер түріне сәйкес пайдалану міндеті енгізілді", - деп хабарлады баспасөз қызметі.
