Қазақстанда астықты терең өңдеу бойынша үш зауыт жұмыс істейді және 2028 жылға дейін тағы үш кәсіпорын іске қосылады деп жоспарлануда. Бұл туралы премьер-министрдің баспасөз қызметі хабарлады.
Қазақстандық "Qostanai Grain Industry" ЖШС Қостанай облысында жылдық қуаты 415 мың тонна астықты терең өңдеу жобасын бастады. Кәсіпорын лизин, глютен, биоэтанол, көмірқышқыл газын шығарады. Пайдалануға беру мерзімі - 2027 жыл, 650 жұмыс орны құрылады.
Түркістан облысында "Қазкрахмал" ЖШС жүгеріні крахмал өнімдерін өндіру үшін өңдеуді жоспарлап отыр. Қайта өңдеу қуаты жылына 100-150 мың тоннаны құрайды. Пайдалануға беру мерзімі - 2026 жыл. 500 жұмыс орнын құру көзделуде.
Түркиялық Tiryaki Agro компаниясы катарлық Hassad Food компаниясымен бірлесіп Астанада қуаттылығы жылына 240 мың тонна астықты терең өңдеу бойынша жобаны бастады. Крахмал, глютен, глюкоза-фруктоза шәрбаты түріндегі соңғы өнімдерді әлемдік нарықтарға экспорттау жоспарлануда. Пайдалануға беру мерзімі - 2026 жыл. 250 жұмыс орнын құру көзделуде.
Сонымен қатар, қазір жалпы қуаттылығы жылына 2 млн тоннадан астам бидай мен жүгеріні терең өңдеу бойынша тағы төрт инвестициялық жоба бойынша келіссөздер жүргізілуде.
Үкімет отырысында Ауыл шаруашылығы вице-министрі Азат Сұлтанов хабарлағандай, Қазақстанда өндірілетін астық көлемі барлық қолданыстағы және жаңа қуаттарды жүктеу үшін жеткілікті.
Вице-министрдің мәліметінше, Қазақстанда жұмыс істеп тұрған зауыттар 2023 жылы 111 мың тонна крахмал өнімдерін өндірген. Өткен жылы астықтан өңделген өнім экспортының көлемі едәуір өсті: жүгері крахмалы – 11,5 мың тонна (2022 жылы 9,3 мың тонна), бидай крахмалы – 15,7 мың тонна (2022 жылы 10,6 мың тонна), глютен – 6,9 мың тонна (2022 жылы 7,7 мың тонна), сірне – 19,4 мың тонна (2022 жылы 16 мың тонна). Өткен жылы импорт 265 тонна бидай крахмалы, 4,2 мың тонна жүгері крахмалы, 8,1 мың тонна сірне, 76,1 тонна глютенді құрады.
Астықты терең өңдеу - бұл жоғары технологиялық күрделілігі бар қымбат кәсіпорындар, сондықтан мемлекет мұндай жобаларға айтарлықтай инвестициялық қолдау көрсетеді. Бұл жұмыс істеп тұрған өндірістерді салу және кеңейту кезіндегі инвестициялық субсидиялар, негізгі және айналым қаражаттарына несие беру кезінде пайыздық мөлшерлемені арзандату, салықтық артықшылықтар.
