Түркия 2024 жылғы 7 маусымнан бастап Қазақстаннан мал шаруашылығы және құс шаруашылығы өнімдерін жеткізуге шектеулерді алып тастады: бұл 2005 жылдан бастап құс тұмауы бойынша, 2016 жылдан бастап аусыл бойынша және 2022 жылдан бастап нодулярлық дерматит бойынша қолданылған шектеулер. Бұл туралы ҚР АШМ баспасөз қызметі хабарлады.
Ағымдағы жылдың наурыз айында ҚР Ауыл шаруашылығы министрі Айдарбек Сапаров Тараздағы түркі мемлекеттері ұйымы елдерінің ауыл шаруашылығы министрлерінің кеңесі барысында кедергілер мәселесін көтерді.
"Қазақстан Түркия, Түрікменстан және Венгрия нарығына жоғары сапалы ет өнімдерін жеткізуге дайын екендігін білдіреді. Өкінішке орай, бүгінгі таңда Түркия нарығы ветеринариялық қызметтер желісі бойынша қазақстандық жеткізушілер үшін іс жүзінде жабық. Ағымдағы жылдан бастап ҚХР мен РФ тарапынан Қазақстанға қатысты осындай шектеулер алынып тасталғанын атап өткім келеді. Осыған байланысты түрік тарапымен де осы мәселені қарауға қайта оралуға болады деп санаймыз", - деп атап өтті Айдарбек Сапаров.
Түркия Республикасы Ауыл шаруашылығы министрінің орынбасары Гизлигидер Эбубекирмен екіжақты кездесу барысында кедергілерді жою мәселелері толығырақ талқыланды. Соңғы шешім ағымдағы жылдың мамыр айында Дүниежүзілік жануарлар денсаулығы ұйымының 91-ші сессиясы аясында екі елдің вице-министрлерінің екіжақты келіссөздерінің нәтижесінде қабылданды.
Түркия Дүниежүзілік жануарлар денсаулығы ұйымына (ДЖДҰ) Қазақстан ұсынған есептерді талдай отырып, аталған аурулармен күресу және жою үшін Қазақстанның қабылдаған күш-жігері мен шараларын жоғары бағалады. Ауыл шаруашылығы министрлігі атап өткендей, бұл шешім Қазақстанның агробизнесі үшін жаңа перспективалар ашуда.
Қазақстандық мал шаруашылығы өнімдерін ілгерілетудің келесі кезеңі ветеринариялық талаптарды келісу болады. Бұл мәселелер ағымдағы жылдың тамыз айында Айдарбек Сапаровтың Түркия Республикасына сапары барысында талқыланатын тақырыптар тізіміне енеді.
"Естеріңізге сала кетейік, бүгінгі таңда Қазақстанның бірқатар өңірлері үшін қой мен ешкі шешегіне қатысты шектеулер әлі де бар. Қалған кедергілерді жою үшін ҚР АШМ ветеринариялық қызметі қажетті шараларды қабылдауда", - деп сендірді АШМ-де.
