Түрік компаниясы Қазақстанда құны $15 млн көкөніс қоймасын салады

Түрік компаниясы Saraylım Tarım Қазақстанда көкөніс қоймасын салып, көкөністерді өңдеу бойынша өндірісті іске қосуды жоспарлап отыр. Бұл туралы ҚР Ауыл шаруашылығы министрлігінің баспасөз қызметі хабарлады.

Қазақстанда жобаларды іске асыру жөніндегі жоспарларды ауыл шаруашылығы вице-министрі Ермек Кенжеханұлы мен Saraylım Tarım Басқарма төрағасы Ылыджа Мұстафа талқылады. АШМ ақпараты бойынша, компания қуаттылығы 5 мың тонна көкөніс қоймасын салуға мүдделі. Жобаның құны шамамен $15 млн құрайды. Сондай-ақ сірке суы мен көкөніс консервілерін өндіруді жолға қою ниеті бар. Жобаға салынған инвестиция сомасы $15 млн құрайды.

Ылыджа Мұстафа жоба Алматы облысында іске асырылатынын, Қазақстандық серіктес анықталғанын хабарлады.

Өз кезегінде вице-министр инвесторларға көрсетілетін мемлекеттік қолдау, көзделген субсидиялар, жеңілдіктер мен преференциялар туралы айтып берді.

"Ауыл шаруашылығы министрлігі жобаны іске асыруға барынша жәрдем көрсетуге дайын", - деп атап өтті Ермек Кенжеханұлы.

Saraylim Tarim Түркия Республикасында жемістер мен көкөністерді сақтау саласында жетекші болып табылады. Кәсіпорынның қойма үй-жайларын сақтау қуаты жылына 14 мың тонна жемісті, қайта өңдеу қуаты жылына 35 мың тоннаны құрайды. Saraylim Tarim өнімдері әлемнің 18 еліне экспортталады.