Қазақстандық ғалымдар дәстүрлі емес ет түрлерінен – ешкі мен түйе етінен балалар тағамының ет өнімдерін өнеркәсіптік дайындау технологиясын әзірледі. Азық-түлік әсіресе тағамның жеке компоненттеріне төзбеушілігі бар балаларға жарайды. Бұл туралы С. Сейфуллин атындағы ҚазАТЗУ баспасөз қызметі хабарлады.
Түйе шаруашылығы мен ешкі шаруашылығы мал шаруашылығындағы перспективалы бағыттар болып табылатынын ескере отырып, түйе, ешкі етінен жасалған ет өнімдерін өнеркәсіптік өндіру салада бұрын пайдаланылмаған жаңа бағытты білдіреді. Майсыз, гипоаллергенді ешкі еті, түйе еті, әсіресе балалар тағамы үшін тұтыну үрдісі бүкіл әлемде өсуде. Сондықтан диеталық қасиеттері бар тағамдық және биологиялық құндылығы жоғары балалар тағамына арналған ет өнімдерінің технологиясын жасау орынды.
"Бұлшықет талшығының ішінде ет шырынын шоғырландыру қабілеті жақсы ешкі еті технологиялық сипаттамалары бойынша құнды ет түрі болып табылады. Осыған байланысты оны балалар тағамы өнімдерін өндіру үшін де ұсынуға болады", - деп атап өтті ҚазАТЗУ "Тамақ және қайта өңдеу өндірістерінің технологиясы" кафедрасының аға оқытушысы Қадыржан Мақанғали.
Ешкі мен түйе етінің тағамдық құндылығы жоғары және ылғал байланыстыратын қабілеті жоғары. Бұл дайын өнімге оң әсер етеді. Сонымен қатар, өнімнің құрамына тартылған ет массасының 1% мөлшерінде портулака ұнтағын қосу антиоксидантты әсерге ие, бұл өнімнің сақтау мерзімін ұзартады. Алынған деректер мектеп жасындағы балалардың тамақтануы үшін әзірленген ет өнімдерін ұсынуға мүмкіндік береді.
