Азық-түлік корпорациясы бидайды сатып алу бағасын бекітті

Экономиканы жаңғырту мәселелері жөніндегі мемлекеттік комиссия биылғы жылы Азық-түлік корпорациясының бидай сатып алу бағасын бекітті. Бұл туралы ҚР премьер-министрінің баспасөз қызметі хабарлады.

Биылғы жылы ауа-райынан зардап шеккен аграрлық саланы қолдау үшін комиссияда форвардтық сатып алу шеңберінде Азық-түлік корпорациясының 3-класты бидай үшін 120 мың теңге және 4-класты бидай үшін 105 мың теңге мөлшерінде сатып алу бағасын белгілеу ұсынылды.

Форвардтық сатып алу және тауарлық несие бойынша фермерлер міндеттемелерді айыппұл төлемей немесе 1,05 немесе 5% коэффициенті бойынша 3-класты бидайды 4-класқа ауыстыру арқылы ақшалай қаражатпен орындай алады.

Міндеттемелерді орындай алмайтын ауыл шаруашылығы өндірушілеріне 3% мөлшерінде банктік сыйақыларды өтей отырып, шартты орындау мерзімін бір жылға ұзартуды жүзеге асыруға мүмкіндік беріледі.

Сонымен қатар, фермерлер Азық-түлік корпорациясының астықты фермерлерден, әсіресе жемдік бидайдан тікелей сатып алуын сұрайды. Бұл астық нарығына әсер етуге және сол арқылы астық өндірушілердің қаржылық жағдайын жақсартуға мүмкіндік береді.

"Баяндалғандарды ескере отырып, 350 мың тонна көлемінде тікелей сатып алуды мынадай бағамен жүзеге асыру ұсынылды: 4-класты бидай үшін 105 мың теңге, 5-класты бидай үшін 90 мың теңге, класты емес бидай үшін 70 мың теңге. Сатып алу бюджеттен тиісті қаражат бөлінгеннен кейін жүзеге асырылады", - деп хабарлады баспасөз қызметінде.