"Ақ Бидай – терминалда" басшы ауысты

"Ақ Бидай – Терминал" АҚ (Азық-түлік корпорациясының еншілес компаниясы) басқарма төрағасы болып Сағат Ыдырысов тағайындалды. Бұл туралы корпорацияның баспасөз қызметі хабарлады.

Азық-түлік корпорациясының басшысы Асылхан Джувашев "Ақ Бидай-Терминал" ұжымына жаңа басшыны таныстырып, астық терминалының қызметімен танысты. Сондай-ақ, терминал арқылы бидай, арпа және жүгеріні экспорттық бағытта: Иран мен Әзірбайжанға ауыстырып тиеуді ұлғайту жоспарлары талқыланды.

Бүгінгі таңда қазақстандық астықты сатып алуға мүдделі шетелдік компаниялармен келіссөздер жүргізілуде.

"Ақ Бидай-Терминал" АҚ астық терминалы Каспий теңізінің шығыс жағалауында, ҚР Ақтау теңіз портында орналасқан. Терминал 2002 жылы бекітілген Қазақстан Республикасының Агроазық-түлік бағдарламасын іске асыру шеңберінде құрылған болатын. Бағдарлама қазақстандық астық экспортын, ең алдымен Кавказ өңірі мен Таяу Шығыс елдеріне тұрақтандыруға және кеңейтуге бағытталған.

2007 жылы кәсіпорын жаңғыртылды. Терминал әлемнің жетекші компаниялары өндіретін жоғары технологиялық жабдықтармен жабдықталды, бұл терминалдың өткізу қабілетін жылына 600 мың тонна астыққа дейін арттыруға мүмкіндік берді.

Терминалда жалпы көлемі 22,5 мың тонна астықты уақытша сақтауға арналған 11 сүрлем бар. Терминалдың ауыстырып тиеу жөніндегі көлік коммуникацияларының өндірістік қуаты сағатына 350 тоннаға дейін астықты құрайды, бұл теміржол вагондарынан тәулігіне 3 мың тоннаға дейін астықты қабылдауға, ал теңіз кемелеріне тәулігіне 4 мың тоннаға дейін астықты жөнелтуге мүмкіндік береді.