Қарағанды облысында СҚО тәжірибесі бойынша ауыл шаруашылығы саласында 14 ірі инвестициялық жобаны іске асыру жоспарлануда. Оларды қолдауға жеңілдікті қаржыландыру бөлінеді. Бұл туралы облыс әкімінің баспасөз қызметі хабарлады.
"Ауыл шаруашылығы министрлігіне біздің облыста 14 жоба ұсынылды. Іске асыруға 37,6 млрд теңге қажет болады. Қаржыландыру "Сарыарқа" өңірлік ӘКК арқылы жүзеге асырылады. Мөлшерлеме жылдық 4% -дан аспайды, мерзімі - 8 жылға дейін. Кепілдік талап етілмейді. Тек жабдық пен мал сатып алу қаржыландырылады, олар кепілге алынады", - деді Қарағанды облысы Ауыл шаруашылығы басқармасы басшысының өндіріс жөніндегі орынбасары Сырым Бошпанов.
Ол өңірде 11 сүт-тауар фермасы салынатынын нақтылап айтты. Олардың бірі Нұра ауданында 800 басқа пайда болады. Осының есебінен сүт өңдеу кәсіпорындары шикізатпен қамтамасыз етіліп, жаңа жұмыс орындары ашылады. Сонымен қатар, ішкі нарықта жергілікті өндірушілердің тауарлары көбірек болады.
Сондай-ақ Абай ауданында картоп қоймасы мен құс фабрикасын салуға қаражат бөлінеді. Бұқар Жырау ауданындағы ет бағытындағы құс фабрикасы жаңғыртылуда.
