Қазақстанда 2023/2024 маусымына күздік дақылдарды сақтандыру басталды

Қазақстанда күздік дақылдардың егістігін құрғақшылықтан сақтандыру шарттарын жасасу бойынша өтінімдер қабылдануда. Бұл туралы Аграрлық несие корпорациясы хабарлады.

"Ағымдағы жылы күздік дақылдар үшін топырақ ылғалдылығының тапшылығынан сақтандыру шарттарын (3 фаза) 31 тамызға дейін Qalqan ақпараттық жүйесінде жасасу қажет. 2023 жылдан бастап бұл жүйе Kezekte.kz порталында жұмыс істейді. Жоғарыда аталған өнімді қорғау кезеңі 15 қыркүйектен келесі күнтізбелік жылдың 30 маусымына дейін", - деп хабарлады Корпорацияда.

АНК мәліметінше, осы бағдарлама арқылы екі жыл ішінде 11 шарт бойынша 13 мың гектар егіс сақтандырылған. Сыйлықақы 62 млн теңгеден асты, оның ішінде субсидиялау – 44 млн теңгеден астам. Сақтандыру жағдайлары нәтижесінде төлемдер 14 млн теңгеден асты.

Алынған төлемдерге Swiss Re халықаралық қайта сақтандыру компаниясы кепілдік берді.

Сондай-ақ, АНК күздік дақылдар үшін топырақ ылғалдылығының тапшылығын индекстік сақтандыру шарттары бойынша 80% мөлшерінде сақтандыру сыйлықақысын субсидиялау түрінде мемлекеттік қолдау шаралары қарастырылғанын атап өтті. Яғни, сақтандыру шарты бойынша фермердің төлемі сақтандыру құнының небәрі 20% құрайды. Индекстік сақтандыру өнімі бойынша тариф сақтандыру сомасының 4,8%, ең жоғары төлем шарт бойынша сақтандыру сомасының 48% құрайды.