Бүгінгі күні Қазақстанда 4,7 млн га дәнді дақылдар алқабы жиналды. Орташа өнімділігі 10 ц/га кезде 4,7 млн тонна астық бастырылды. Бұл туралы Ауыл шаруашылығы министрлігінің баспасөз қызметі хабарлады.
Ведомствоның мәліметінше, елдің оңтүстік өңірлері астық жинауды аяқтап жатыр. Шымкентте егін толығымен жиналды, Жамбыл облысында-98,3%, Түркістанда астық 86% жиналды.
Сонымен қатар, елімізде өнімділігі 7 ц/га болатын 58,7 мың тонна майлы дақылдар бастырылды, 728,4 мың тонна картоп, 1,9 млн тонна көкөніс және 2,7 млн тонна бақша дақылдары жиналды.
Егін жинау науқанына 149,9 мың трактор, 38,6 мың комбайн, 13,5 мың орақ және 140,3 мың басқа техника жұмылдырылды.
Егін жинау науқанына арналған 426 мың тонна жеңілдікті дизель отынының 207 мың тоннасы төленіп, 185 мың тоннасы жөнелтілді.
Биыл Аграрлық несие корпорациясының желісі бойынша көктемгі егіс және егін жинау жұмыстарын қаржыландырудың жалпы сомасы 140 млрд теңгені құрады. Қаражат толығымен игерілді. Азық-түлік корпорациясы арқылы 21,2 млрд теңге ауыл шаруашылығы өнімдерін форвардтық сатып алуға, көктемгі егіс жұмыстарын іске асыру және кейіннен қаржыландыру үшін 528 мың тонна көлемінде тауарлық несиелеуге тағы 60 млрд теңге бағытталды.
