Қазақстанда дизель отынының бағасын арттыру жоспарлануда

Қазақстанның Энергетика министрлігі бензин мен дизель отынының шекті бөлшек бағасын көтеруді жоспарлап отыр. Бұл туралы брифингте Энергетика министрінің міндетін атқарушы Болат Ақшолақов мәлімдеді.

"ЖЖМ ішкі нарығын тұрақтандыру мақсатында Қазақстан мен көрші елдер арасындағы баға айырмасын төмендету қажет. Сондықтан біз күрделі, бірақ сонымен бірге қажетті қадамға баруымыз керек - шекті бөлшек сауда бағасын көтеру", - деді Болат Ақшолақов.

Дизель отынының шекті бөлшек бағасын орта есеппен 20% - ға арттыру ұсынылады: 230-260 теңге/литрден (өңірге байланысты) 295 теңге/литрге дейін. АИ-92 және АИ-93 маркалы бензиннің бағасын 11% - ға арттыру жоспарлануда: 182-187 теңгеден 205 теңге/литрге дейін.

Болат Ақшолақов атап өткендей, Қазақстан үш мұнай өңдеу зауытын жаңғыртқаннан кейін өндірістік қуатын 3 млн тоннаға, жылына 17 млн тоннаға дейін ұлғайтты. Оның ішінде дизель отыны өндірісі 30% - ға, 4 млн-нан 5,2 млн тоннаға дейін өсті. Бірақ өткен жылы дизель отынын өндірудің рекордтық көлеміне қарамастан, еліміздің кейбір өңірлерінде тапшылық қайта пайда болды. Оның тапшылығы қымбат импорттық отынмен жабылуы керек еді.

"Ең қарапайым есептеулер бойынша, өткен жылы транзиттік көліктің үлесіне 150 мың тоннаға жуық дизель отыны келген. Тағы 200 мың тонна жанармай "сұр" экспортпен шығарылды. Мұның себебі бағаның айтарлықтай айырмашылығы. Қазақстан жанар-жағармай бағасы ең төмен елдер тізіміне кіреді. Мысалы, Ресейде дизель отынының құны литріне орташа есеппен 345 теңгені құрайды, бұл 45% - ға қымбат. Ал Қырғызстанда бағасы 64% - ға жоғары және литріне 390 теңгені құрайды, Өзбекстанда ол екі есе қымбат - литріне 480 теңге (101%). Қазақстандық дизель отынын шетелге қайта сатудан түскен vаржа 50% - дан 120% - ға дейін және одан да көп, жалпы жылына 140 млн долларға дейін жетеді", - деді Болат Ақшолақов.