Сенаттағы Үкімет сағатында Ауыл шаруашылығы министрі Ербол Қарашөкеев өндірісті ұлғайту және қант саласының импортқа тәуелділігін төмендету үшін Кешенді жоспар іске асырылып жатқанын айтты. Шикізатты қайта өңдеуге тапсыру кезінде субсидиялар нормативі 15 теңгеден 25 теңгеге дейін арттырылды. Сондай-ақ Кешенді жоспарда қызылша өсіруге арналған егіс кешендеріне инвестициялық субсидиялар нормативін 25-тен 50% - ға дейін ұлғайту көзделеді. Қант зауыттарына айналым қаражатымен қамтамасыз ету үшін ӘКК арқылы 0,1% мөлшерлеме бойынша 18 млрд теңге мөлшерінде жеңілдікті несиелер берілді.
Сондай-ақ, 22 сәуірден бастап үшінші елдерден қамыс шикізатын бажсыз әкелуге 350 мың тонна мөлшерінде тарифтік жеңілдік қолданылатынын еске саламыз. Қант өндірушілерді баға демпингінен қорғау мақсатында қанттың ең төменгі көтерме бағасын енгізу тетігі әзірленді.
«Ағымдағы жылы қант қызылшасының егіс алқабы 64% - ға ұлғайтылып, 19 мың гектарға жеткізілді. Орта мерзімді перспективада қант өндірісін 283 мыңнан 490 мың тоннаға дейін ұлғайту жоспарлануда», — деп хабарлады Үкімет сағатында.
