Бүгін Қазақстанда, әлемнің басқа елдеріндегідей, нан күні атап өтілуде. Осы күнге дейін елімізде дәнді дақылдарды жинау аяқталуға жақын, 14,6 млн тонна астық бастырылды. Бұл туралы Ауыл шаруашылығы министрлігінің баспасөз қызметі хабарлады.
"Бүгінгі таңда республика бойынша жұмыстар 15,6 млн гектарға (90,2%) жүргізілді. Орташа өнімділік 9,3 ц/га кезінде аграрлар 14,6 млн тонна астық бастырды", - деп хабарлады Ауыл шаруашылығы министрлігі.
Қазақстанда нан күні ресми түрде 2019 жылдан бастап, үкіметтің қаулысымен аталған мереке бекітілген кезден бастап аталып өтіледі. Оның мақсаты - астық өнімдерінің жоғары мәртебесін нығайту.
Ауыл шаруашылығы министрлігінде атап өткендей, нан күні осы құнды өнімді өндіруге қатысқан барлық шаруалардың: аграрлардың, ұн тартушылардың, наубайшылардың кәсіби мерекесі болып табылады.
"Биылғы жыл диқаншылар үшін қиын болды. Алайда, барлық сын-қатерлерге, қолайсыз ауа райы жағдайларына қарамастан, Қазақстан ішкі нарықты бидайдың қажетті көлемімен толық қамтамасыз етеді, сондай-ақ өзінің экспорттық әлеуетін сақтайды", - деп атап өтті АШМ-де.
