Қазақстанда су үнемдеу технологияларына субсидиялар ұлғаяды

ҚР Үкіметі бүгін отырыста су ресурстарын басқару жүйесін дамытудың 2024-2030 жылдарға арналған тұжырымдамасын бекітті. Құжат 20 жаңа су қоймасын салу, 15 су қоймасын және 14 мың шақырымнан астам ирригациялық каналды қайта жаңарту, сондай-ақ су тапшылығын азайту мақсатында гидротехникалық құрылыстарды жаңғырту бойынша бірқатар шұғыл шараларды көздейді. Сондай-ақ су үнемдеу технологияларын енгізу кезінде мемлекеттік қолдау шаралары күшейтіледі. Бұл туралы ҚР Су ресурстары және ирригация министрлігінің баспасөз қызметі хабарлады.

"Фермерлерді су үнемдеу технологияларын қолдануға ынталандыру үшін ауыл шаруашылығы министрлігімен бірлесіп суару жүйелерін құруға, тамшылатып және жаңбырлатып суару жабдықтарын сатып алуға арналған шығындарды субсидиялау үлесін 50% - дан 80% - ға дейін ұлғайту бойынша жұмыс басталды. Қазақ Су шаруашылығы ғылыми-зерттеу институтының бағалауы бойынша бұл шамамен 2,1 текше шақырым суды үнемдеуге, сондай-ақ ауыл шаруашылығы өнімінің өнімділігін 1,5 - 2 есеге арттыруға мүмкіндік береді", - деп хабарлады ведомстводан.

Тұжырымдама сонымен қатар 3,5 мың шақырымнан астам арналарды цифрландыруды және суару жүйелеріндегі суды есепке алуды автоматтандыруды көздейді. Су ресурстарын ұтымды пайдалану үшін суармалы жерлердің мелиоративтік жағдайын жақсарту жоспарлануда.

Жалпы, кешенді жоспарды іске асыру 2030 жылға қарай суармалы жерлердің ауданын 2,5 млн гектарға дейін, ал қолда бар су ресурстарының көлемін тасымалдау кезінде су шығынын 50%-дан 25%-ға дейін төмендету жолымен 2,4 текше шақырымға ұлғайтуға мүмкіндік береді деп күтілуде. Бұдан басқа, жоспарды іске асыру экономика салаларын тұрақты сумен жабдықтау үшін гидротехникалық құрылыстардың жай-күйін жақсартуға, сондай-ақ төтенше жағдайлардың туындау қаупін азайтуға мүмкіндік береді.