Қазақстанда пайдаланылмаған және заңсыз берілген ауыл шаруашылығы жерлерін қайтару жөніндегі комиссия жұмысы жалғасуда. 2023 жылдың басынан бері мемлекет меншігіне 891,7 мың га жер қайтарылды. Бұл туралы Ауыл шаруашылығы министрлігінің баспасөз қызметі хабарлады.
Жыл басынан бері Жер ресурстарын басқару комитетінің аумақтық бөлімшелері жер пайдаланушыларға қатысты 486 мың га аумақ бойынша 381 жоспардан тыс тексеруді тіркеді. Нәтижелері бойынша ауданы 304,7 мың га болатын 152 ұйғарым енгізілді.
"Сонымен қатар, биыл мемлекетке 891,7 мың га бос тұрған ауыл шаруашылығы алқаптары қайтарылды. Бұдан басқа, әкімдіктерге қатысты 65 тексеру жүргізілді, ауыл шаруашылығы мақсатындағы жер учаскелерін беру туралы 117 заңсыз шешім анықталды. Жергілікті атқарушы органдардың атына жер заңнамасын бұзушылықтарды жою туралы 54 ұйғарым берілді", - деп хабарлады баспасөз қызметі.
Сонымен қатар, Ауыл шаруашылығы министрлігі жұмыстар қарқынмен жалғасып жатқанын атап өтті. Екі жыл ішінде қайтаруға жататын 10 млн гектардың жалпы сомасы 6,3 млн гектары мемлекеттік меншікке өтті.
"Мемлекетке қайтарылған ауыл шаруашылығы жерлері тұрғындарды кейіннен қоғамдық жайылымдармен оңтайлы қамтамасыз ету үшін аудандар резервіне қойылады. Жоғарыда аталған жер учаскелері халықты жалпы пайдаланымдағы жерлермен толық қамтамасыз еткеннен кейін ғана конкурсқа шығарылатын болады", - деп хабарлады Ауыл шаруашылығы министрлігі.
