Қазақстанда фермерлер үшін қарсы міндеттемелер енгізілді

Ауыл шаруашылығы министрлігі қарсы міндеттемелерді енгізу туралы нормаларды қабылдай отырып, өсімдік шаруашылығын, мал шаруашылығын және ауыл шаруашылығы өнімдерін қайта өңдеушілерді субсидиялау қағидаларына өзгерістер енгізді. "Қазақстан Республикасы Ауыл шаруашылығы министрлігінің кейбір бұйрықтарына өзгерістер енгізу туралы" тиісті бұйрық 2025 жылғы 1 қаңтардан бастап қолданысқа енгізілді.

Субсидиялар алу үшін фермерлер мен қайта өңдеушілер жыл сайын өздері өндірген өнім көлемі туралы деректерді бұл көлемді өткен жылға қатысты төмендетпей ұсынуы тиіс. Бір жылдағы жалпы өнім көлемі автоматты түрде теңгедегі сомасында ГААЖ-ға қайта есептеледі. Ол үшін 2025 жылғы 20 қаңтарға дейін ГААЖ-ға 2024 жылғы өнімге (тауарға немесе қызметке) орташа республикалық бағалар туралы деректер енгізілетін болады.

Ағымдағы жылдың қорытындысы бойынша шаруашылықтар ГААЖ-да жалпы өнім көлемін тіркейді. Әрі қарай салыстыру жүргізіледі. Қарсы міндеттеме өндіріс көлемі екі жыл қатарынан қысқарған жағдайда орындалмаған болып есептеледі. Бұл жағдайда фермер бір жыл ішінде субсидия алуға өтініш бере алмайды. Міндеттемелерді қайта орындамаған жағдайда, фермер екі жыл ішінде қаржыландыру мүмкіндігінен айырылады.

Қарсы міндеттемелерді орындау сыртқы факторлардан - табиғи-климаттық жағдайлардың, фитосанитариялық немесе эпизоотиялық жағдайлардың нашарлауынан зардап шеккен шаруашылықтардан талап етілмейді. Бұл жағдайда ауыл шаруашылығы өндірушісі ГААЖ-ға осы фактіні растайтын құжатты (Қазгидрометтен ауа райы жағдайлары туралы анықтама, карантин немесе шектеу іс-шараларын белгілеу туралы ЖАО шешімі, жануарлар ауруын анықтау туралы сараптама актісі, зиянкестердің, өсімдік аурулары мен арамшөптердің егістіктерді зақымдауы туралы акт) орналастыруы қажет.

Қағидаларда сондай-ақ ауыл шаруашылығы өндірушісі субсидиялауға өтінім бергенге дейін ГААЖ жеке кабинетінде өндірілген жалпы өнімнің көлемі туралы ақпаратты орналастыратыны және оны электрондық цифрлық қолтаңбамен растайтыны нақтыланады.

"Бұл көрсеткіш түзетуге жатпайды. Қарсы міндеттемелер туралы мәліметтер қарсы міндеттемелер тізілімінде көрсетіледі және пайдаланушылар үшін жалпыға қолжетімді болып табылады", - делінген құжатта.