Қазақстандық фермерлер тыңайтқыштарды субсидиялауға 13 251 өтінім берді. Ауыл шаруашылығы басқармаларының жұмысында 9027 өтінім бар, 2040 өтінімнен бас тартылды, ал 7,5 млрд теңге сомасына 2184 өтінім мақұлданды және төленді. Бұл туралы Ауыл шаруашылығы министрлігінің баспасөз қызметі хабарлады.
АШМ деректері бойынша, бұрын gosagro.kz порталында өтінімдердің үштен бірі қабылданбады. Мемлекеттік қолдаудан бас тартудың негізгі себебі: 2023 жылғы 1 қаңтарда күшіне енген агрохимиялық картограммалардың болмауы, сондай-ақ өрістерді цифрландырудағы қиындықтар болды.
Осы мәселені шешу үшін АШМ 25 сәуірде агрохимиялық картограммаларды пайдалану жөніндегі талапты жоққа шығаратын Ережеге түзетулерді бекітті, сондай-ақ 2023 жылғы 31 желтоқсанға дейін "Қазақстан Ғарыш Сапары" ҰК" АҚ арқылы өрістерді цифрландыру бойынша кейінге қалдыруды енгізеді.
Белгіленген мерзімге дейін фермерлер осы егістіктерді құқық белгілейтін құжаттарға сәйкес міндетті түрде түзетуі қажет екенін атап өткен жөн. Тиісті кестені АШМ "Қазақстан Ғарыш Сапары" ҰК" АҚ-мен бірлесіп дайындауда.
Сондай-ақ, субсидияларды алуға облыс әкімдіктерінің тыңайтқыштарды субсидиялау тізбелері мен нормалары туралы тиісті қаулыларының болмауы кедергі болды. Жергілікті атқарушы органдар нормативтерді наурыз айында ғана бекіте бастады және процесті мамырға дейін созды. Атап айтқанда, Атырау облысында қаулы осы күнге дейін қабылданған жоқ. Өңірлік әкімдіктің ақпараты бойынша, құжат жақын арада бекітілетін болады.
