Қазақстанда үш күн ішінде мал ұрлығымен айналысқан 12 топ ұсталды

Қазақстан ІІМ барлық өңірлерде "Мал ұрлаушы" жедел-алдын алу іс-шарасын өткізді. Нәтижесінде үш күн ішінде 12 қылмыстық топ ұсталды, деп хабарлады Polisia.kz.

Операцияны жүргізуге 4 мыңнан астам полиция қызметкері, сондай-ақ ауыл шаруашылығы басқармаларының 400 маманы жұмылдырылды. Ұрланған мал мен ет өнімдерін өткізуді анықтау мақсатында 3,5 мыңнан астам ет базарлары, павильондар мен сою цехтары тексерілді.

"Үш күн ішінде 141 мал ұрлығы анықталды, оны жасағаны үшін 94 адам, оның ішінде 12 қылмыстық топ ұсталды. 360-тан астам мал табылып, иелеріне қайтарылды. Сонымен қатар, ветеринария саласында 800-ге жуық бұзушылық, сондай-ақ ауыл шаруашылығы жануарларын жаю ережелерін 2 мыңға жуық бұзушылық анықталды. Бұл бағыттағы жұмыс жалғасуда, - деді ІІМ ресми өкілі Шыңғыс Алекешев.