1 сәуірде басталған суару маусымы Қазақстанның барлық облыстарында ресми түрде аяқталды. Вегетациялық кезеңде Су ресурстары және ирригация министрлігі фермерлерге шамамен 11,2 миллиард текше метр су берді. Бұл туралы үкіметтің баспасөз қызметі хабарлады.
Биылғы жылы ҚазСуШар филиалдары шаруа қожалықтарымен суармалы су беруге 25 мыңға жуық шарт жасасты. Қызылорда облысының аграрлары алынған су бойынша көшбасшыларда – шамамен 3,7 млрд текше метр, Түркістан облысында – 3,4 млрд текше метр. Жетісу облысының шаруа қожалықтарына 1,37 млрд текше метр су, Алматы облысы бойынша – 1,57 млрд текше метр су берілді.
"Үкімет төтенше жағдайлар мен суармалы су тапшылығының алдын алды. Біз өткен жылғы тәжірибеден сабақ алып, фермерлерге суармалы судың үздіксіз жеткізілуін қамтамасыз ете алдық. Су дипломатиясы маңызды рөл атқарды. Биылғы жылы үкіметтің жемісті келіссөздерінің арқасында Өзбекстан, Қырғызстан және Тәжікстан елімізге бастапқыда жоспарланғаннан көп су жіберді", – деді су ресурстары және ирригация министрі Нұржан Нұржігітов.
Қазір Үкімет су тасқыны кезеңіне дайындалуда. Елдің солтүстік, батыс, шығыс және орталық аймақтарындағы су қоймаларынан су ағызу басталды. Қазақстанның оңтүстігіндегі су қоймалары жинақтау режимінде жұмыс істейді.
Орталық Азияның Мемлекетаралық су шаруашылығы үйлестіру комиссиясының таяудағы отырысында Нарын-Сырдария су қоймалары каскады жұмысының болжамды кестесі жасалады және келесі жылдың болжамды кезеңіне су беру көлемі бекітіледі.
