Қызылорда облысында күріш жинау басталды

Қызылорда облысында күріш жинау басталды Облыс әкімі Нұрлыбек Нәлібаев Шиелі ауданының аграрларымен кездесіп, оларға мол өнім тіледі. Бұл туралы облыс әкімінің баспасөз қызметі хабарлады.

"Биыл облыс бойынша 193,4 мың га егілді. Оның ішінде дәнді дақылдар 99,9 мың га, майлы дақылдар - 4,5 мың га, жемшөп дақылдары - 69,2 мың га, қант қызылшасы - 5 га, картоп, көкөніс, бақша дақылдары-19,8 мың га. Өңірдің негізгідақылы - күріш,89 мың гектарға егілді. Жалпы егіс алқабы өткен жылмен салыстырғанда 4,8 мың гектарға артық. Енді біздің міндетіміз шығынсыз егін жинау", - деді Нұрлыбек Нәлібаев.

Астық жинауды бастау рәсімі Тұран ауылдық округінде, "Төнкеріс және К" шаруа қожалығында өтті. Биылғы жылы шаруашылық 1050 га күріш отырғызды, қазір мұнда гектарына орта есеппен 50-55 центнер жиналуда.

Әкімдіктің мәліметінше, бүгінгі таңда өңірде ерте пісетін дәнді дақылдар толық жинақталған. 4,3 мың гектар алқапта 7 мың тонна күздік бидай жиналды, 4,4 мың гектардан 3,2 мың тонна жаздық бидай, 365 гектардан 209 тонна жаздық арпа, сондай-ақ 7 тонна сұлы жиналды.

Биыл егін жинау жұмыстарына 4239 бірлік техника (1816 трактор, 842 комбайн, 453 орақ, 333 автомашина және 795 трактор тіркемесі) тартылады. Ауыл шаруашылығы құрылымдарына "ҚазАгроҚаржы" АҚ арқылы 49 техника сатып алуға 1,4 млрд теңге бөлінді. Сондай-ақ, егін жинауға төмендетілген бағамен 9,1 мың тонна дизель отыны бөлінді.