ҚР премьер-министрінің қаулысымен Жамбыл облысының Байзақ, Жамбыл, Қордай, Меркі, Т.Рысқұлов және Талас аудандарында өңірлік ауқымдағы табиғи сипаттағы төтенше жағдай режимі жарияланды. Оның себебі құрғақшылық пен су тапшылығына байланысты дақылдардың апаты болды.
"Осыған байланысты ҚР Үкіметінің төтенше резервінен облыстың жоғарыда аталған аудандарында ауа райының қолайсыздығынан және судың жетіспеушілігінен туындаған фермерлердің шығындарын жабуға қаражат бөлу мәселесі шешілуде", - деп хабарлады облыс әкімдігі.
Болжам бойынша, өңірде өнім шығыны шамамен 25-30% құрайды. Бұған дейін үкімет басшысының тапсырмасы бойынша ведомствоаралық жұмыс тобы құрылды, оның құрамына ауыл шаруашылығы, төтенше жағдайлар, экология және табиғи ресурстар министрліктерінің, су ресурстары комитетінің, "Қазсушар" Жамбыл облыстық филиалының және жергілікті атқарушы органдардың өкілдері кірді. Жұмыс тобының мүшелері егістікке барып, шаруа қожалықтарының басшыларымен кездесті. Сондай-ақ, премьер-министр Әлихан Смайылов өңірдегі шаруалармен кездесті.
"Бүгінгі таңда өңірдің алты ауданында жұмыс топтары мен ғылыми-зерттеу институттарының залалды есептеу бойынша бірлескен жұмысы жалғасуда. Шаруа қожалықтарына келтірілген залалдың көлемі вегетациялық кезең аяқталғанға дейін айқындалатын болады, ал жақын күндері жарамсыз алқаптардың ауданы мен залал көлемі нақтыланатын болады. Осыған байланысты Жамбыл облысының әкімі жауапты тұлғалардың алдына фермерлерге келтірілген залал көлемін есептеудің заңдылығын қатаң қадағалау жөнінде хаттамалық міндет қойды", - деп хабарлады әкімдікте.
