Жамбыл облысында 2025 жылға дейін жалпы көлемі 46,2 млн текше метр болатын 13 су қоймасы салынады. Қазіргі уақытта көлемі 1,4 млн текше метр болатын үшеуі салынуда. Бұл туралы облыс әкімдігінде хабарлады.
Сондай-ақ, Жамбыл ауданы Жасөркен ауылындағы гидрологиялық бекеттің және жұмыс істеп тұрған екі су қоймасының (650 млн текше метр) жөндеу жұмыстары жалғасуда.
Жамбыл облысының алты ауданында су инфрақұрылымдық нысандарын жөндеу жұмыстары жүргізілуде. 2027 жылға қарай халықаралық қаржы институттарының қаржылық қолдауымен ұзындығы 876 км және суармалы жер көлемі 69 мың га болатын 361 су объектісін қайта жаңарту жоспарлануда.
Облыстың су тапшылығы бар аудандарында жер асты суларын пайдалану үшін ұңғымаларды бұрғылау жұмыстары жүргізілуде. Бүгінгі таңда 103 ұңғыма бұрғыланды және пайдаланылуда, тағы 543 ұңғыма бұрғылау жоспарында.
Жүргізіліп жатқан жұмыстар вегетациялық кезеңде суармалы суға тәуелділікті трансшекаралық су көздерінен 50% - ға дейін төмендетуге мүмкіндік береді деп күтілуде.
Ағымдағы маусымда Жамбыл облысы құрғақшылық пен судың аздығынан қатты зардап шекті. Облыстың алты ауданында ТЖ режимі жарияланды. Зардап шеккен фермерлерге өтемақы төлеуге үкімет резервінен 3,7 млрд теңгеден астам қаражат бөлінді.
