Жер ресурстарын басқару комитеті 2024 жылы облыста 90 мың га ауыл шаруашылығы мақсатындағы жерді мемлекеттік меншікке қайтаруды жоспарлады. Оның ішінде бүгінде 85 060 га қайтарылды. Бұл туралы комитет басшысы Мұрат Теміржанов мәлімдеді.
Атап айтқанда, жерді пайдалану мен қорғауға мемлекеттік бақылау жүргізу кезінде Жер ресурстарын басқару департаменті наурыз айында мемлекет меншігіне кадастрлық (бағалау) құны 33 млн теңге болатын 15 мың гектар жайылымды қайтарды.
"Департаментпен ЖК "Батырға" тиесілі жер учаскелеріне жоспардан тыс тексеру жүргізілді және Қазақстан Республикасы Жер кодексінің 65-бабының талаптары сақталмағаны, бұзушылықтарды жою туралы нұсқама бір жыл мерзімге берілгені анықталды. Алайда, ЖК "Батыр" жер пайдаланушысына қойылған нұсқаманың талаптарын орындамауына байланысты Департамент Жетісу облысының мамандандырылған ауданаралық сотына аталған жер учаскелерін мәжбүрлеп алып қою туралы талап арыз берді, ол 2024 жылғы 6 ақпанда толық қанағаттандырылды және заңды күшіне енді", - деп хабарлады Мұрат Теміржанов.
Ол бұл бағыттағы жұмыс жалғасып жатқанын және облыстық департаменттің тұрақты бақылауында екенін атап өтті.
