Жетісу облысында егіс алқаптарында пайдаланылатын элиталық тұқымдардың үлесін 2,6%-ға дейін жеткізу жоспарлануда. Ол үшін "элита" класының 2,5 мың тонна тұқымын себу жоспарлануда. Өңірде барлығы 57,7 мың тонна жаздық дақылдар тұқымы дайындалды. Бұл туралы облыс әкімінің баспасөз қызметі хабарлады.
Бүгінгі таңда дайындалған тұқымдарға зертханалық сынақтар жүргізілуде. Зерттеуге жататын 33,4 мың тоннаның 29,4 мыңы тексерілді, 25 мың тоннаның сапасы расталды.
"Жоспарға сәйкес қолданылатын элиталық тұқымдардың үлесін 2,6%-ға дейін жеткізу қажет. Ол үшін дәнді жүгері, бидай, арпа, соя, күнбағыс, қант қызылшасы, жемшөп дақылдары, картопты қоса алғанда, 2,5 мың тонна көлемінде элиталық тұқымдар егілетін болады. Осы мақсатта Қазақ егіншілік және өсімдік шаруашылығы ғылыми-зерттеу институты тұқым өндірушілермен және сатушылармен тығыз жұмыс істейді. Облыста өткізілетін семинарлар барысында біз жоғары репродукциялы ауыл шаруашылығы дақылдарының қолда бар тұқымдары туралы ақпаратты шаруашылықтардың назарына жеткіземіз, өйткені өнімділік көбінесе тұқым материалының сапасына байланысты екені ешкімге құпия емес", - деді Жетісу Ауыл шаруашылығы басқармасының басшысы Нұрдәулет Кененбаев.
Берілген өтінімдерге сәйкес 13,5 мың гектарды қамтитын қант қызылшасының тұқымы жеткізілді. Қызылша өсірушілерге Көксу қант зауыты мен "Жетісу" ӘКК тұқым береді. Сондай-ақ, "Алем Агро" серіктестігі шаруашылықтармен "Конвизо-Смарт" тұқымын жеткізуге келісім-шарттар жасасуда.
