Венгриялық UBM Group Қазақстанда жем өндіру зауыттарын салады

ҚР Ауыл шаруашылығы министрлігі, Kazakh Invest және Венгриялық өндіруші UBM Group Қазақстанда құрама жем және премикс өндіру жөніндегі жобаларды іске асыру туралы үшжақты негіздемелік келісім жасасты. Құжатқа Қазақстан мен Венгрия басшыларының Будапешттегі келіссөздерінің қорытындысы бойынша қол қойылды, деп хабарлады Ақорданың баспасөз қызметінен.

Келіссөздер қорытындысы бойынша Қазақстан президенті Қасым-Жомарт Тоқаев пен Венгрия премьер-министрі Виктор Орбан бірлескен мәлімдеме жасады. Келіссөздер барысында екіжақты сауда көлемін ұлғайту және инвестициялық ынтымақтастықты тереңдету талқыланды.

"UBM холдингімен біз құны $62 млн болатын үш жем шығаратын зауыт салу туралы келісімге қол қойдық. Экономикалық байланыстарды жандандыру - уақыт талабы. Біз сирек металдарды өндіру және қайта өңдеу, су шаруашылығы және аграрлық саланың әлеуетін толық пайдалануымыз керек. Күн тәртібінде сауда номенклатурасын кеңейту, инновациялық технологияларды тарту, энергетика, цифрландыру және көлік секторларында әріптестікті нығайту мәселелері тұр", - деді Қасым-Жомарт Тоқаев.

Президент 2023 жылы Қазақстан мен Венгрия арасындағы өзара тауар айналымы 9%-ға өскенін атап өтті. Мақсаты - оны 1 миллиард долларға жеткізу.

"Біз Венгрияға жалпы сомасы $700 млн болатын тауарлардың 95 түрін жеткізуге дайынбыз. Қазақстан энергетика, металлургия, мұнай химиясы, машина жасау, ауыл шаруашылығы және құрылыс өнімдерін экспорттауға мүмкіндігі бар. Венгриялық компаниялар Қазақстандағы инвестициялық жобаларға қызығушылық танытуда. 2005 жылдан бастап елімізге 370 млн венгриялық инвестиция тартылды", - деді Қасым-Жомарт Тоқаев.