Ақтөбе облысында өлген мал иелеріне 144,3 млн теңге төленді

Су тасқыны кезінде Ақтөбе облысында 3 232 бас мал қырылды. Жануарлардың иелеріне 909 бас үшін 144,3 млн теңге көлемінде өтемақы төленді. Бұл туралы облыстық ауыл шаруашылығы және жер қатынастары басқармасынан хабарлады,

Өңірде су тасқынынан зардап шеккендерге көмек көрсету бойынша жұмыстар жалғасуда, су тасқыны салдарын жою үшін құрылған арнайы комиссия жұмыс істейді.

Өлген мал үшін өтемақы төлеу бекітілген алгоритм бойынша жүргізіледі. Малдың өлу фактісі және оның тиесілігі анықталғаннан кейін аудандық статистика бөлімі жануардың түріне және жасына байланысты нарықтық бағаны көрсетеді. Осы мәліметтерге сәйкес өтемақы мөлшері анықталады. Қаражат аудандағы төтенше жағдайлардың алдын алу және жою жөніндегі комиссияның қорытынды актісінен кейін аударылады.

Бұған дейін Қазақстан АШМ-де жалпы республика бойынша су тасқыны кезінде 8,2 мың бас ауыл шаруашылығы жануарларының өлгені туралы хабарлаған болатын. Жалпы өлген малдың шамамен 70% ұсақ мал болды.