Қазақстанда аграрлар үшін ЖЖМ тікелей субсидиялауды енгізуді ұсынды

Мәжілістегі "Ақ жол" фракциясының депутаттары аграрларды жеңілдікті дизель отынымен қамтамасыз ету процесі тым бюрократияланған деп есептейді. Олар фермерлерге тікелей субсидия беру арқылы ЖЖМ шығынын бақылау тетіктерін қайта қарауды ұсынып отыр.

Мәжіліс депутаты Ерлан Барлыбаев ҚР премьер-министрінің бірінші орынбасары Роман Склярдың атына жолдаған сауалында егіс жүргізуге бөлшек отыннан 15% төмен бағамен 401 мың тонна дизель отыны бөлінетінін еске салды. Дизель отынының ашықтығы мен қозғалысын бақылауды қамтамасыз ету үшін Энергетика министрлігі бірқатар шараларды ұсынды: ауыл шаруашылығы өндірушілері үшін жеке ПИН-кодтарды енгізу, дизель отынын түрлі түстерге бояу, шот-фактуралардың электрондық жүйесінде дизель отыны үшін жеке виртуалды қойма құру.

"Ақ жол" партиясы аталған шаралар күтілетін тиімділіктің орнына ЖЖМ сатып алу процесін бюрократияландыруға, әкімшілік жүктемені, ЖЖМ өндіру кезіндегі шығындарды ұлғайтуға, көктемгі-дала жұмыстарының қызған кезінде отынмен жедел қамтамасыз етуді қиындатуға және ауыл шаруашылығы өндірушілеріне қосымша әкімшілік кедергілер мен жүктеме тудырып, оларды бөлінетін "түрлі түсті "дизель отынын сақтау орындарымен шаруашылықтарды қамтамасыз етуге мәжбүр етеді деп санайды, бұл олардың қаржылық шығындарын арттырады", - деп атап өтті Ерлан Барлыбаев.

Оның орнына депутаттық фракция аграрлардың ЖЖМ шығындарының 15% оларды сатып алу туралы растайтын құжаттарды ұсынғаннан кейін тікелей субсидиялау тетігін енгізуді ұсынады. Сондай-ақ, депутаттар егіс және егін жинау жұмыстары кезінде жанар-жағармай материалдарына қол жеткізуді қиындататын артық әкімшілік кедергілерді алып тастауды сұрайды.

"Бұл тәсіл ауыл шаруашылығы өндірушілеріне жеткізушіні таңдауда, оның ішінде олардың орналасқан жері бойынша икемділікті қамтамасыз етеді және қосымша бюрократиялық кедергілерді жасамай, отынмен қамтамасыз ету процесін едәуір жеңілдетеді деп санаймыз", - деп атап өтті депутат.