Қазақстанда әкімдіктердің жедел деректері бойынша 20,7 млн тонна шөп немесе жоспардың 82,7% дайындалды. Республикалық деңгейден едәуір төмен көрсеткіштер Павлодар (38,1%), Шығыс Қазақстан (57,2%), Атырау (57,9%), Батыс Қазақстан (58,8%) және Абай облыстарында сақталуда. Бұл туралы Ауыл шаруашылығы министрлігінің баспасөз қызметі хабарлады.
Шөп қоры бойынша көшбасшылар Түркістан (100,9%), Қостанай (100%), Жамбыл (97,2%), Солтүстік Қазақстан (93,1%) және Ақмола (92,7%) облыстары болып табылады.
Жем дайындау жағдайы жемшөппен қамтамасыз ету мәселелерін шешуді үйлестіру жөніндегі жедел штабтың кезекті отырысында талқыланды. Ауыл шаруашылығы вице-министрі Аманғали Бердалин жыл басынан бері көзделген жемшөп субсидияларының көлеміне Алматы, Атырау, Қарағанды, Павлодар және Ұлытау облыстарының әкімдіктері 11,7 млрд теңгеге қосымша 10,1 млрд теңге бөлетінін хабарлады.
Облыс әкімдіктеріне қыстайтын жерлерге жем дайындау және тасымалдау жұмыстарын жандандыру тапсырылды. Сондай-ақ жеке қосалқы шаруашылықтарды азықпен қамтамасыз етуді бақылауда ұстау, бұл ретте бағаның негізсіз өсуіне жол бермеу жөнінде шаралар қабылдау тапсырылды.
Сонымен қатар, штаб отырысында фермерлерді жемшөп дайындау жұмыстары үшін жеңілдікті дизель отынымен қамтамасыз ету мәселесі талқыланды. Ұлытау облысының әкімдігіне жем дайындауға бөлінген арзандатылған дизель отынының көлемін төлеу және іріктеу жөнінде қажетті шаралар қабылдау тапсырылды.
Бұрын берілген тапсырмаларды ескере отырып, Павлодар облысының әкімдігі Солтүстік Қазақстан облысымен жасалған меморандум шеңберінде сабан мен жем дайындау жұмыстарын жандандыруы қажет.
