Аквашаруашылық туралы заң жобасы Мәжілісте бірінші оқылымда мақұлданды

Мәжіліс бірінші оқылымда "Аквашаруашылық туралы" заң жобасын және оған қатысты түзетулерді мақұлдады. Негізгі мақсат өндірістерді құру және кеңейту арқылы аквашаруашылықтың тұрақты дамуын қамтамасыз ету болып табылады, деп хабарлады Ауыл шаруашылығы министрлігінің баспасөз қызметі.

Ауыл шаруашылығы вице-министрі Аманғали Бердалин заң жобалары аквашаруашылық объектілерінің экспорттық әлеуетін дамыту үшін жағдай жасауға, аквашаруашылық саласындағы жаңа технологиялар мен процестерді тиімді енгізуді қолдауға, сондай-ақ бәсекеге қабілеттілікті арттыру үшін бизнеске көмек көрсетуге бағытталғанын атап өтті.

Субсидиялау, жеңілдікпен несие беру және ғылыми сүйемелдеу түрінде мемлекеттік қолдаудың қосымша шаралары көзделген. Бұл балық өсірушілердің құзыретін жақсартуға және инновациялық технологияларды енгізуге мүмкіндік береді.

Сондай-ақ, өнімнің қауіпсіздігін және қоршаған ортаны қорғауды қамтамасыз ету мақсатында аквашаруашылық саласында мемлекеттік бақылау жолға қойылады. Бақылау тексеру және алдын алу іс-шаралар нысанында жүзеге асырылатын болады.

Заң жобасы шеңберінде мониторингтің ақпараттық жүйесін енгізу жоспарлануда, оның мақсаты деректерді жинау, бизнес субъектілерінің тізілімін жүргізу және аквашаруашылық объектілерін қадағалау болады.

Су айдындарын электрондық портал арқылы конкурстық негізде ұсыну жоспарлануда, бұл ресурстарды бөлу процесінде ашықтықты қамтамасыз етеді. Сонымен қатар, ең төменгі инвестициялық талаптарды орындау кезінде су айдындарын конкурстарсыз ұсыну көзделген. Инвесторлар өндіріс орындарын құруға және өсіру көлемін ұлғайтуға міндетті болады.