Қазақстанда соңғы аптада ұлттық валюта бағамының күрт әлсіреуі байқалады. Қазақстан қор биржасында (KASE) бағам бір доллар үшін 524,79 теңгеге дейін төмендеді. Премьер-министрдің орынбасары – ұлттық экономика министрі Нұрлан Байбазаров брифингте үкіметтің осы жағдайларда инфляцияны тежеу үшін қандай шаралар қабылдайтынын хабарлады.
"Әлеуметтік маңызы бар азық-түлік тауарларының бағасын ұстап тұру үшін қысқы және көктемгі маусымаралық кезеңге қарай едәуір көлемде қалыптасқан жаңа өнім қоры тартылатын болады. Тұрақтандыру қорларының, сауда объектілерінің қоймаларында және ауыл шаруашылығы өндірушілерінде 29 негізгі түрі бойынша 826 мың тоннадан астам азық-түлік сақталады. Бұл қорлар сақтау мерзімдерін ескере отырып үнемі толықтырылып отырады және елдің қажеттіліктерін бірнеше айға қамтамасыз ете алады. Сондай-ақ, жаңа жылдық мерекелер жақындаған сайын бағаның ықтимал өсуін тежеу үшін қосымша шаралар қабылдануда. Өңірлерде тұрақты ауылшаруашылық жәрмеңкелері ұйымдастырылады. Қысқы кезеңде және маусымаралық кезеңде бағаны одан әрі тұрақтандыру үшін ақпан айының басында тұрақтандыру қорларынан көкөністерді броньсыздандыруды бастау жоспарлануда, бұл нарықты қажетті өнім көлемімен қамтамасыз етуге және баға ауытқуларының алдын алуға мүмкіндік береді", - деді Нұрлан Байбазаров.
Ол сондай-ақ маусымаралық кезеңде ішкі нарықты көкөністермен қанықтыру үшін жақын шетелден ерте көкөністерді жеткізу үшін "жасыл дәліз" ұйымдастырылғанын хабарлады. Бұдан басқа, сауда саласында бизнеспен тығыз өзара іс-қимыл жүзеге асырылады.
Айта кетейік, Ұлттық статистика бюросының деректері бойынша қараша айында Қазақстанда инфляция 0,9%, ал жылдық есепте 8,4% деңгейінде қалыптасты. Азық-түлік тауарларының бағасы бір айда 1,1%-ға өсті.
Қияр - 40,3%, қызанақ – 37,3%, тәтті бұрыш -15,5%, пияз – 13,9%, сарымсақ – 10,1%, қырыққабат – 8,9%, картоп – 6,2%, апельсин – 4,8%, лимон – 4,1%, күнбағыс майы – 4% қымбаттады. Бағаның төмендеуі күрішке – 2%-ға, қантқа – 1,9%-ға, алмаға - 0,7%-ға байқалды.
Бір жыл ішінде (2024 жылдың қарашасы 2023 жылдың қарашасына) азық-түлік тауарлары 5,4%-ға қымбаттады.
