Жамбыл облысында көкөністерді сусыздандыру зауыты салынады

Қытайлық Wanlin Group компаниясы Жамбыл облысында сусыздандырылған көкөністер өндірісін іске қосу жобасын іске асыруды бастады. Компанияның негізін қалаушы және басқарма төрағасы Ли Яньтао өткен аптада Бейжіңде өткен ҚР вице-премьері Серік Жұманғаринмен кездесуде Қазақстандағы жұмыс жоспарлары туралы айтқан еді. ҚР премьер-министрінің баспасөз қызметінен хабарлағандай, азық-түлік өндірісі – Wanlin Group тобының қызмет бағыттарының бірі.

Компанияның азық-түлік бизнесі сусыздандырылған көкөністерді (сарымсақ, ақ пияз және т.б.) өндіруге және экспорттауға бағытталған. Компания Циндао мен Сиань қалаларында екі тамақ өнімдерін зерттеу орталығын құрды, Қытайдың әртүрлі аудандары мен қалаларында 6 мың гектардан астам көкөніс отырғызу базаларын құрды.

Олардың өнімдері АҚШ, Еуропа және Таяу Шығыс елдеріне белсенді экспортталады. Компания Nestle, Кraftheinz, Kerry, European Spice Services, Unilever және басқа да әлемдік брендтердің ресми серіктесі болып табылады.

"Жамбыл облысында біз көкөністер мен жемістерді сусыздандыру жобасын бастадық, зауыт құрылысына инвестиция салуды жоспарлап отырмыз. Сусыздандыру саласында біз 32 жылдан бері жұмыс істеп келеміз. Команда, технология бар. Келесі айда сіздерге келуді жоспарлап отырмыз. Біз Қазақстандағы серіктестермен жобаны кіммен жүзеге асыратынымызды шештік", — деді Ли Яньтао кездесуде.

.Серік Жұманғарин қытайлық бизнесмендер үшін Қазақстанға инвестициялау рәсімдері барынша жеңілдетілетініне сендірді.