Ақмола облысындағы Capital projects Ltd компаниясы қуаттылығы тәулігіне 1 млн жұмыртқа болатын пастерленген сұйық және құрғақ жұмыртқа өнімдерін шығаруды жоспарлап отыр. Бұл Қазақстандағы тауық жұмыртқасын терең өңдейтін алғашқы зауыт болмақ, деп хабарлады ҚР премьер-министрінің баспасөз қызметі.
Кәсіпорын жұмыртқа өнімдерін өндіруде әлемдік көшбасшы Thornico (Sanovo) компаниясымен эксклюзивті келісімге қол қойды. Жобаны келесі жылы жеңілдетілген несиелеу түрінде мемлекеттің қолдауымен іске асыру жоспарлануда.
Capital projects LTD қуаты жылына 20 мың тонна болатын "Курочка Ряба" брендімен өнім шығарады. Жақын арада мемлекеттік қолдаудың арқасында өндірістік қуаттылықты 30 мың тоннаға дейін ұлғайту жоспарлануда.
Фабрика "Шаңырақ" компаниялар тобының құрамына кіреді, ол тауық еті мен жұмыртқа өндірісінің толық циклін қамтамасыз етеді - ата-аналық мал өсіруден бастап дайын өнімді беруге дейін. Сондай-ақ, кәсіпорын құрама жем өндіру және экспорт үшін ауыл шаруашылығы дақылдарын өсірумен айналысады. Фабрика минималды қалдықтармен жұмыс істейді: тіпті тауық көңі де өз дақылдары үшін органикалық тыңайтқыштарға қайта өңделеді.
Қазіргі уақытта майлы дақылдарды қайта өңдеу желісінің құрылысы жүргізілуде, бұл жемшөп өндірісін 25%-ға арзандатуға мүмкіндік береді. Бұл тауық жұмыртқасы мен құс етінің бағасына оң әсер етеді, өйткені жем өнімнің өзіндік құнының негізгі және ең қымбат құраушысы болып табылады.
Фабрикада ылғалды астықты сақтаудың заманауи әдістері де енгізілді. Сегіз жылдан бері мұнда 18-20% ылғалдылығы бар астықты сақтау үшін пластикалық жеңдер қолданылады. Олар астықты алты айға дейін сақтауға мүмкіндік береді, ал көктемде оны ашуға, кептіруге және сақтауды жалғастыруға болады. Кәсіпорын басшысы Максим Божконың айтуынша, оттегінің болмауына байланысты астықты жыл бойына сақтауға болады, бұл оның сақталуын едәуір жақсартады.
