Қостанай облысында астықты терең өңдеу зауыты іске қосылады

KazFoodProducts агрохолдингі Қостанай облысында бидайды терең өңдеу зауытын салу жобасын іске асыруда. Компания осы инвестициялық жобаны іске асыру бойынша ынтымақтастық туралы Меморандумға "Baiterek Venture Fund" АҚ, қытайлық Myande Group Co., Ltd компаниясымен және Қостанай облысының әкімдігімен қол қойды, деп хабарлады АШМ баспасөз қызметінен.

Жобаның құны 50 млрд теңгеден асады. Меморандумға Қазақстан-Қытай Іскерлік кеңесі аясында қол қойылды.

KazFoodProducts-тың бас директоры Әлихан Талғатбектің айтуынша, Qostanay Grain Industry жаңа зауытының қуаттылығы жылына 400 мың тоннаны құрайды. Мұнда аминқышқылдары, биоэтанол, глютен, мал азығы, бидай кебегі өндіріледі.

Qostanai Grain Industry жобасын пайдалануға беру мерзімі 2027 жылғы желтоқсан. Жаңа өндірісте 600 жұмыс орны құрылады.

Бұдан басқа, меморандум шеңберінде "Азия Агрофуд" зауытының өндірістік қуатын тәулігіне 200 тоннадан 300 тоннаға дейін ұлғайту жөніндегі жоба көзделген. Компания Алматы облысында бидай мен жүгеріні терең өңдеу саласында көшбасшы болып табылады.

"Бұл жобалар азық-түлік қауіпсіздігі мен экспорттық әлеуетті арттыруға оң әсер етеді, сондай-ақ агроөнеркәсіптік кешенді дамытуға оң әсер етеді деп күтілуде", - деп атап өтті Ауыл шаруашылығы министрлігінде.