Астық қолхаттары несие беру кезінде кепіл ретінде қабылданады

Қаржы институттары ағымдағы жылы астық қолхаттарын аграрийлерге несие беру кезінде берік кепіл ретінде қабылдай бастайды. Бұл туралы бүгін Үкімет отырысында ҚР Ауыл шаруашылығы министрінің міндетін атқарушы Ербол Қарашөкеев мәлімдеді.

"Президенттің Жарлығына сәйкес ағымдағы жылдың соңына дейін астық қолхаттарын несиелеу мақсаттары үшін квазимемлекеттік сектор субъектілерінің кепілдігімен қатты кепіл санатына енгізу жоспарлануда. Ол үшін Министрлік Қазақстан Республикасының Қаржы нарығын реттеу және дамыту агенттігімен және Ұлттық банкпен бірлесіп, астық қолхаттарды кепіл ретінде енгізу үшін критерийлер мәселесін пысықтауда", - деді Ербол Қарашөкеев.

Фермерлер үшін жеңілдікті қаржыландырудың қолжетімділігін арттыру үшін екінші деңгейдегі банктер мен микроқаржы ұйымдарына несие беруді ұлғайту бойынша жұмыс жүргізілуде. Сондай-ақ, "Бәйтерек" холдингі ұйымдары тарапынан Агроөнеркәсіптік кешен және тамақ өнеркәсібі салаларындағы жобаларды қоса қаржыландыру тетіктері кеңейтілуде.

Жеңілдетілген қаржыландыру көлемін ұлғайту үшін Аграрлық несие корпорациясы арқылы АӨК басым бағыттары бойынша инвестициялық жобаларды несиелеуге 40 млрд теңге бағыттау жоспарлануда.

Бұдан басқа, ауыл шаруашылығы техникасын, оның ішінде жемшөп дайындайтын техниканы және суарудың мобильді жүйелерін сатып алуды қаржыландыру үшін кейіннен лизингке беру үшін ағымдағы жылы "ҚазАгроҚаржы" АҚ жарғылық капиталын ұлғайтуға 20 млрд теңге бөлінетін болады. Жалпы, үш жыл ішінде осы мақсаттарға 79,4 млрд теңге бюджеттік инвестиция бағыттау жоспарлануда.