Тауарлар
Қызметтер
Тасымалдау қызметі
Абай облысында ауқымды өрт жалғасуда. Өңірде 60 мың гектардан астам жер өртеніп кетті. ТЖМ мыңдаған қызметкерлері сұрапыл өртпен күресуде, бірақ қатты жел мен жер бедерінің ерекшеліктері жағдайды қиындатады. Өрт сөндірушілермен бірге реликті қарағайлы орманды фермерлер де құтқаруда, олардың кейбіреулерінің алқаптары оқиғаның эпицентріне жақын орналасқан.
Қазақстан фермерлер қауымдастығының Абай облыстық филиалы 500-ге жуық ірі және орта шаруа қожалығын біріктіреді. Өңірде барлығы 1 мыңға жуық фермер ауыл шаруашылығымен айналысады: жеке кәсіпкерлер ретінде де, ЖШС немесе ШҚ-ға бірлескен түрде де.
Қазақстан фермерлер қауымдастығының Абай облыстық филиалының төрағасы Серік Байғалиев күн сайын «Семей орманы» орман резерватына жақын орналасқан Бородулиха ауданының ауылдарын аралайды. Апатқа жақын ауылдардың тұрғындары эвакуацияланды, қалғандары жергілікті фермерлер көрсететін гуманитарлық көмек алады.
«Қазір бар күнімді мен осы ауылдарда өткіземін. Фермерлер бәрі сұрапыл апатпен күресуге шықты - құтқарушыларға су, тұрғындарға азық-түлік жеткізу арқылы көмектеседі. Өрттен өлген жабайы жануарлар үшін өте өкінішті, бірақ ауылшаруашылық жануарларының зардап шекпегені тыныштандырады, дегенмен қауіп әлі де бар. Өрттің аумағы өте үлкен және өрт жалғасуда. Бородулихино - Абай облысындағы жалғыз егіс ауданы, қалғандары мал шаруашылығымен айналысады. Егіс алқаптары әзірге аман, жанатын нәрсе де жоқ, жаз енді басталды. Бірақ егістік жерлер үшін бәрібір қорқынышты», — деп бөлісті Серік Байғалиев.
Фермердің айтуынша, өртті сөндіру өте қиын, өйткені техника орманға әрең жетеді. «Семей орманы» резерватының аумағында қылқан жапырақты және жапырақты ағаштар ғана емес, сонымен қатар барқанды құм бар.
«Лазарев және К» ЖШС егістік жерлері жанып жатқан қарағайлы орманнан 25 км қашықтықта орналасқан. Шаруа қожалығының басшысы Петр Лазаревтің айтуынша, өрт жақындап келеді.
«Орман бірнеше күн бойы өртеніп жатыр. Егістік жерлер зардап шеккен жоқ, бірақ егер өрт жалғаса берсе, онда оның өртену қаупі бар. Өрт Бұлақ, Талица және Половинки ауылдарына жақындады, қазір өрт сөндірушілер жұмыс істеуде, біз КамАЗ машиналармен су тасимыз. Біз тәулік бойы ауысыммен кезекшілік жүргіземіз, ағаштарға шашыратамыз, өрт сөндірушілерге азық-түлікпен көмектесеміз. Құтқарушы балалар әлі де отты сөндіреді деп үміттенеміз, ал жаңбыр бәрімізді құтқарар еді», — гдейді Петр Лазарев.
«Лазарев және К» ЖШС өсімдік және мал шаруашылығымен айналысады. Шаруа қожалығының жалпы ауданы - 15 мың гектарға жуық, оның 12 мың гектары күнбағыс, күздік бидай және жүгеріге берілген, қалғаны жайылымдық жерлер. 2010 жылдан бастап «Лазарев және К» ЖШС-де қазақтың ақбас тұқымы өсіріледі. Қазіргі уақытта 1350 бас «ақбас» сиыры, сонымен қатар жылқылар мен қойлар бар.
Абай облысының ауыл шаруашылығы басқармасының басшысы Анзор Абаевтың хабарлауынша, 12 маусымдағы жағдай бойынша егістіктердің немесе жайылымдық жерлердің өртенуі туралы деректер жоқ. Тек орман қорығының резерваты жанып жатыр.
Абай облысының әкімі Нұрлан Уранхаев 13 маусымда өткен Үкіметтегі кеңесте елді мекендерге өрт қаупі жоқ екенін баяндады. Өртті сөндіруге ТЖМ, Қорғаныс министрлігінен, Орман шаруашылығы комитетінен және жергілікті атқарушы органдардан 1800-ден астам адам мен 350 техника жұмылдырылды.
Абай облысы ауыл шаруашылығы басқармасының ақпараты бойынша, биыл ауыл шаруашылығы дақылдарының егіс алқабы 743,6 мың га құрады, оның ішінде 316,8 мың га - дәнді дақылдар, 278,2 мың га - майлы дақылдар , 134,5 мың га - жем-шөп дақылдары, картоп - 7,9 мың га және көкөністер - 6,2 мың га.
Мал шаруашылығы саласында өңірде 938 мыңнан астам ірі қара мал, 377 мыңнан астам жылқы және 1,5 миллионға жуық ұсақ мал өсіріледі. Сондай-ақ, 39 бордақылау алаңы бар, оның 11-і 22 мың басқа арналған өнеркәсіптік түрде.
Самал Ахметова
