Тори жылқысы (Торик) (Thorian)

Тарихы

Тұқымның шығарылуы 1856 жылы құрылған "Тори" зауытымен байланысты. Эстон жылқыларының, норфольк, ағылшын-норманд, остфриз, постье-бретон, таза қанды мініс жылқысы, тракенен, орлов желісті тұқымдарын күрделі қайта жаңғырту мақсатында будандастыру қолданылды. 1950 жылы тіркелген.

Тұқым стандарты

Конституциясы күшті, шымыр. Дене бітімі үйлесімді, айқын жегін жылқы. Шоқтығының орташа биіктігі - 162 см, тұрқының қиғаш ұзындығы – 170 см, жіліншігінің орамы – 22,3 см. Тірідей салмағы - 550 кг дейін. Басының өлшемі орташа, маңдайы кең. Мойны қысқа, шомбал, шығысы төмен. Шоқтығы төмен, жалпақ. Кеудесі терең. Арқасы кең, қысқа емес. Сауыры кең, ұзын, бұлшықеті жақсы дамыған, көбіне қосарлы. Аяқтары ұзын емес, етсіз, тұяқтары берік, буындары анық бедерленіп тұрады. Жалы мен құйрығының қалыңдығы орташа. Терісі тығыз. Түсі жирен, күрең (мал басының шамамен 60%), басы мен аяқ-қолында ақ белгілері бар, торы (34%), баран, бурыл сирек кездеседі. Ішкі үш түрі қалыптасқан:

• ТА түрі – ауырлатылған.
  
• Т түрі – негізгі (орта).
  
• ТВ түрі – жеңілдетілген.
  

Шаруашылық сипаттамасы

Тұқым күй талғамайды, бірқатар ауруларға төзімді. Жақсы өсіп-өну сапасына ие - 100 биеден 86 құлын. Әдетте, ұрғашылары 20 жасқа дейін көбеюде қолданылады, бірақ үлкен жаста да - 30 жасқа дейін аман-есен құлындау жағдайлары көп кездеседі.

Ұқсас тұқымдар

Тушин жылқысы (Tushinskaya).