Нормандиялық коб
Тұқымның атауыЖылқылар
Жануардың түріМініс-жегін
Бағыты
Тұқым Нормандиядағы Сан-Ло (Маника департаменті) ат қораларында дүниеге келген. Оның тарихы француздың селль тұқымының тарихымен байланысты, өйткені екеуі де ағылшын-норманд тұқымынан шыққан. Тұқымның тағайындалуы дене құрылысын қарапайым бағалаудан туындайды: біріншісі, салт мінетін жылқылар үшін қалыпты, мезодолихоморфты типке; екіншісі, мезобрахиморфты типке жатады, мықтырақ және бұлшық етті, бірақ қимылдары икемді. Ле Пэн мен Сан-Лода бұл жылқылар арбаның делбелерінде немесе тәртесінде шатаспауы үшін, олардың құйрықтарын кесу әдетке айналған. 1948 жылдан бері Англияда қабылданған бұл әдет-ғұрып осы жылқыларды өздерінің атауы осыдан шыққан ағылшын кобына ерекше ұқсас етеді; басқа ұқсастықтары – тығыз дене құрылысы және жортаңдап қарқынды жүгіруі.
Ең көп таралған түстері: жирен, торы, қара торы; буырлы және сұр сирек кездеседі. Басы көбінесе үлкен, төменгі жағының тармағы сәл ауырлау, бейіні түзу немесе жаншылған, көздері үлкен, аралығы кең орналасқан, құлақтары кішкентай, қозғалмалы, сақ. Мойны айтарлықтай қысқа және бүгілген, бұлшық етті және дөңес топшыларына қарай кеңейеді. Шоқтығы сәл көтерілген, мойнының бейінімен бірігеді. Арқа-бел сызығы қысқа және түзу, белі мықты және кең, сауыры төмендеу, құйрығы жоғары қарай қосылған. Омырауы кең, іші тығыз, терең, күшті, қабырғалары сүйірленген. Аяқтары қысқа және қалың: білектері бұлшық етті және арқаға жақсы салынған, тұсарлары да қысқа, диаметрі жақсы және сүйектері қалың; шабатын буындары сәйкесінше орналасқан, дұрыс бұрышы бар, сіңірлері қалың және тығыз. Тұяқтары орташа көлемді, сау және қатты мүйізді жабыны бар. Кейде тұяқтың үстіндегі түктерден күлтелер кездеседі. Шоқтығының биіктігі - 160-170 см.
Норманд кобының барлық айғырлары мен биелері тіркелген, жыл сайын құлындары әртүрлі тестілерден өтеді. Үлкен массасына қарамастан, тұқымның жүрісі керемет, сымбаты тамаша және әсіресе жортақтағанда тәкаппар, паң көрінеді. Өткен ғасырда бұл жылқылар пошта арбаларын тасымалдау үшін пайдаланылған. Қазір ол фермерлердің талаптарын толығымен қанағаттандыра отырып, ауыл шаруашылық жұмыстарында пайдаланылады.
